Нема новодијагностицирани случаи со коронавирус. Првата пациентка е испишана и е во сосема добра клиничка состојба. Здравствената состојба на сите 18 пациенти е непроменета, изјави министерот за здравство Венко Филипче на денешната прес-конференција во Владата.

Информира дека во тек е тестирање на седум лица, од кои три од Дебар што имаат симптоми на грип, двајца од Штип и двајца се на Инфективната клиника кои изминатиот период патувале во Австрија и Германија.

Во Дебар, како што истакна, состојбата е мирна и граѓаните се придржуваат до мерките. – Луѓето покажуваат исклучително висок степен на дисциплина, рече Филипче.

Во овој регион се проширува бројката на луѓе што се тестираат со цел детално да се скенира состојбата.

- Се проширува бројот на луѓе што се тестираат. Очекуваме во текот на денов или во текот на утрешниот ден да стигнат меѓу 40, 50 дури и 80 луѓе со цел детално да се скенира овој регион - рече Филипче, додавајќи дека координацијата на здравствените работници во Дебар е добра.

Новина е тоа што Клиниката за психијатрија почнува со психолошка поддршка и оти ќе се ослободи од работа еден од родителите на деца со цистична фиброза. Подготвен е и списокот со лекари, анестезилози и медицински сестри кои би ротирале доколку има потреба.

 - Искрено се надевам дека нема да дојде до тоа сценарио да имаме многу пациенти на машини за дишење. На располагање се близу 440 медицински сестри и 200 анестезиолози од целата држава - подвлече Филипче.