Редок метеорит од Марс откриен пред две години во западноафриканската држава Нигер беше продаден на аукција во Њујорк минатиот месец на неименуван купувач.

Палеонтологот Пол Серено, кој има блиски врски со земјата, верува дека метеоритот треба да се врати во Нигер.

Милионгодишното парче од Црвената планета, најголемото досега пронајдено на Земјата, беше продадено во „Сотби“ за 4,3 милиони долари (3,2 милиони фунти). Како и купувачот, продавачот останал анонимен, но не е јасно дали дел од парите отишле во Нигер.

Многумина сега се прашуваат како парчето завршило во светски познатата американска аукциска куќа, додека владата на Нигер изрази загриженост за можна нелегална меѓународна трговија. Нигер започна истрага за околностите околу откривањето и продажбата на метеоритот, кој го доби научното име „NWA 16788“ (NWA е кратенка за Северозападна Африка).

Во италијански академски труд објавен минатата година се вели дека метеоритот е пронајден на 16 ноември 2023 година, во пустината Сахара во регионот Агадез во Нигер, 90 км западно од оазата Чирфа, од неидентификуван ловец на метеорити.

Метеоритите можат да паднат насекаде на Земјата, но поради поволната клима за зачувување и недостатокот на човечко влијание, Сахара станала одлична локација за нивно откривање. Според италијански напис, „NWA 16788“ бил продаден од локална заедница на меѓународен трговец, а потоа префрлен во приватна галерија во италијанскиот град Арецо.

Од „Сотби“ тврдат дека сè било легално

Од „Сотби“ во соопштение наведуваат дека „NWA 16788“ бил извезен од Нигер и транспортиран во согласност со законот.

-Како и со сè што продаваме, целата релевантна документација била во ред во секоја фаза, во согласност со најдобрите практики и барањата на вклучените земји - се вели во соопштението.

Професорот Серено, кој ја основа организацијата „НигерХеритиџ“ пред десет години, е убеден дека законот е прекршен.

Останува нејасно како некој успеал да извади толку тежок, впечатлив артефакт од земјата без властите очигледно да го забележат.