Основачот на „Пајрат беј“, Петер Сунде, без влакна на јазикот ја критикува денешницата на интернетот. Тој смета дека сè што можело да тргне наопаку, тргнало. „Веќе не е прашање што ќе се случи во иднина, бидејќи оваа војна веќе ја изгубивме. Сега сè се сведува на контрола на штетата“, истакнал Петер.


„Самите одлучивме да ги централизираме своите податоци и да ги испратиме во рацете на Марк Зукерберг, кој практично е најголемиот диктатор на денешницата, бидејќи тој не е избран да го одредува патот по кој сите одиме, но всушност тоа го прави. Интернетот е смислен како децентрализиран простор, без целосна контрола, но сите ние ја централизиравме таа приказна. Ние повеќе не креираме опипливи услуги и производи, туку сè прерасна во виртуелен свет кој е централизиран и под контрола на најголемите“, вели Петер.

Кога се споменуваат најголемите, тој мисли на „големата петорка“: „Гугл“, „Епл“, „Мајкрософт“, „Амазон“ и „Фејсбук“. Петорката која во текот на последните децении купила сè што вреди во светот на технологијата и интернетот и практично ги презела потенцијално самостојните стартапи.

Сунде го поставува прашањето: Кој ја има контролата над информациите за тоа каде одат автономните возила, каде смеат, а каде не смеат да одат. Тој смета дека шансата за отворен интернет без контрола од „најголемите“ одамна е изгубена.

„Доцна е да се верува дека нешто може да се промени. Единствена шанса е на големите компании, кои контролираат сè, ЕУ и САД да им ја ограничат моќта. За жал, ни ЕУ ни САД немаат никаква намера тоа да го направат, а вие сами заклучите зошто. Приказната потсетува на зависност од цигари: знаеме дека е штетно, но секако не можеме да престанеме со пушење“, заклучил Петер Сунде.