Следната недела „Гугл“ ќе го лансира прототипот на сателит за првото тестирање во орбитата во рамките на проектот „Санкечр“, чија цел е да утврди дали вселената би можела да биде место за сместување инфраструктура од големи размери за компјутерски операции на вештачката интелигенција.

Во соопштението се наведува дека новата мисија, која ќе биде реализирана за време на претстојното лансирање на мисијата „Транспортер 18“ на компанијата „Спејс екс“, ќе процени како хардверот за вештачка интелигенција на „Гугл“ ги поднесува силите при лансирањето, зрачењето и екстремните температури во ниската Земјина орбита.

По лансирањето, прототипот на сателит со ТПУ-чипови на „Гугл“ ќе биде испратен во ниската Земјина орбита за да се утврди дали тие чипови можат сигурно да функционираат во вселената.

Вселенското зрачење може да го наруши работењето на електрониката или да доведе до нејзино оштетување, меѓу другото, и со предизвикување грешки во податоците.

Од „Гугл“ наведоа дека ги тестирале своите ТПУ-чипови за време на извршувањето на задачите со вештачка интелигенција во фабриката на Универзитетот во Калифорнија во Дејвис, но дека е неопходно тестирање во орбитата за да се разбере како хардверот функционира во реални услови.

Компанијата ќе го процени своето решение за ладење на чиповите со голема потрошувачка на енергија во вакуумот на вселената, каде што конвенционалното ладење со струење на воздух е невозможно, со комбинирање на топлински цевки и радијатори.

Првата мисија на „Санкечр“ е осмислена така што ќе прибере податоци во орбитата и ќе ги идентификува потенцијалните точки на дефект, а не да демонстрира работа на оперативен орбитален центар за податоци, соопшти „Гугл“.

Компанијата планира лансирање на два сателити во 2027 година за да ги тестира ласерските врски со висок проток, кои се неопходни за поврзување на идните компјутерски кластери.

Извор: Nova.rs
Фото: Magnific