На „Инстаграм“ кружи измама во која се тврди дека оваа социјална мрежа ги менува правилата за користење, по што фотографиите на корисниците ќе можат да бидат искористени против нив на суд.
- Сè што некогаш сте објавиле, од денес станува јавно. Дури и пораките што сте ги избришале - пишува во пораката што масовно се споделува на оваа социјална мрежа, иако станува збор за целосна бесмислица.
Но, за масовната хистерија овој пат придонесоа и многу познати личности, кои исто така наседнале на оваа глупост. Џон Тери, Рита Ора, Пинк, Зое Салдана, Ашер се само некои од ѕвездите што го споделиле ова лажно „предупредување“ и го тагнале „Инстаграм“ за да му дадат до знаење дека нема нивна „дозвола“.
- Подобро е да се биде сигурен, макар и да станува збор за измама. Им се извинувам на сите оние што би можеле да се навредат на кој било начин од ова - напишала пејачката Пинк.
- Не постои вистина во постот - изјави портпаролот на „Инстаграм“. Ова не е првпат на социјалните мрежи да се шират вакви измами, но досега ретко можеше да се види на некои од нив да наседнат и толку многу познати личности.