Дали некогаш сте слушнале за синдром на добра девојка? Тој се јавува кај жени кои чувствуваат потреба да им угодуваат на сите околу себе, ставајќи ги сопствените желби и потреби на последно место. Ова самоодрекување може сериозно да влијае врз здравјето.
Терапевтот Дајан Ленг истакнува дека многу жени страдаат од овој синдром.
- Многу од нас се воспитани да бидат тивки, скромни и да се грижат сите други да бидат среќни. Тоа е однесување што се учи. И мажите можат да се трудат да им угодат на другите, но жените почесто се однесуваат така поради начинот на кој сме воспитани - објаснува Ленг.
Синдромот на добра девојка подразбира недостиг на граници, страв од конфликти, избегнување да се каже сопствено мислење и слично. Многумина не се свесни дека ова однесување не влијае само врз психичкото, туку и врз физичкото здравје. Може да предизвика проблеми со варењето, главоболки, несоница, губење апетит и други симптоми, пренесува порталот „Кликс“.
Сепак, овој синдром може да се надмине - со учење како да се постават здрави граници и како да се каже „не“ на работи што нè вознемируваат.
Ленг додава дека во процесот на закрепнување важни се малите чекори: да си легнувате порано, да јадете поздраво, да шетате почесто. Исто така, препорачува секое утро да пишувате дневник во кој ќе ги запишете мислите на хартија без да се осудувате.
- Мора да бидете подготвени дека овој процес може да биде застрашувачки. Кога ќе почнете да се менувате, кога ќе кажете „не“ и ќе поставите граници, тоа ќе влијае и врз луѓето околу вас. Некои ќе се вознемират, можеби ќе се променат и вашите односи со нив. Но тоа е знак дека сте на добар пат - вели таа.
Затоа, ако се пронајдовте во овие зборови, запомнете - да бидете добри не значи да се изгубите себеси. Ставот, границите и грижата за себе не ве прават себични, туку ве прават здрави.
Извор:
n1info.hr
Фото: Freepik