Осито, осумгодишно мешанче од пудлица, привлече големо внимание кај навивачите на отворањето на Светското првенство во Мексико Сити, каде што пристигна со велосипед со својот сопственик Хорхе Рангел.
Навивачите го дочекаа во дрес на Мексико, со очила за сонце и капа, па бројни минувачи застануваа за да го фотографираат, погалат и објават снимки на социјалните мрежи. Набрзо се појави и во меѓународните телевизиски преноси, со што стана една од најзабележителните вирални приказни на турнирот.
За Хорхе Рангел, вниманието не е најважниот дел од приказната. Осито веќе две години го придружува речиси насекаде додека секојдневно го обиколува градот на специјално прилагоден товарен велосипед.
- Осито е многу повеќе од куче, тој е мој секојдневен сопатник - изјави тој.
Нивното возење започна случајно, кога Рангел еднаш го ставил кучето во кутија за испорака на велосипедот и го однел на кратка прошетка. Бидејќи Осито очигледно уживал, сопственикот со текот на времето додал перници, го прилагодил просторот и почнал да го носи на подолги рути низ градот. Поради мирното држење и различните комбинации на облека, некои минувачи на почетокот го мешале со кадифена играчка.
Пред почетокот на првенството, Рангел со недели подготвувал додатоци за да се издвојат во масата на навивачи што одат кон стадионот. Тој вели дека реакцијата ги надминала очекувањата, но верува дека луѓето најмногу ги привлекува односот меѓу него и кучето.
- Не знаев што значи да се сака животно додека Осито не влезе во мојот живот - рече Рангел, опишувајќи го миленикот како важна емоционална поддршка во тежок период од животот.
Извор:
Klix.ba
Фото:
Instagram