Движењето за климатска правда „Петоци за иднината Скопје“ побара од средните училишта во Скопје да им дозволат на учениците утре да ги напуштат првите два часа од втората смена за да можат да присуствуваат на протестот против климатските промени, кој ќе се одржи пред Владата со почеток во 13 часот.

- Добивме десетици пораки од наши соученици што сакаат да бидат дел од протестот, но се плашат дека ќе сносат последици поради тоа. Апелираме до професионалната етика, но и до совеста на директорите и професорите од скопските училишта. Драги просветни работници, пронајдете ја повторно во себе причината поради која сте ја избрале оваа вокација. Ова не е обично отсуство или бегање од часови, туку нешто многу поголемо и поважно. Не ставајте им неоправдани изостаноци на вашите деца, туку напротив, охрабрете ги да дојдат на настанот и заедно со нивните врсници од целиот свет да се изборат за здрава и безбедна иднина. На крајот на краиштата, придружете им се и вие! Тие не смеат да се плашат од вас и од вашиот образовен систем, туку треба да ја развиваат свеста за тоа што нè опкружува и тоа што претставува вистинска закана за нивните млади животи - се наведува во соопштението на „Петоци за иднината Скопје“.

Фото: Фејсбук

Во соопштението се посочува дека под притисокот на движењето „Петоци за иднината“, средните училишта во Њујорк нема да ги спречуваат учениците да присуствуваат на протестот пред седиштето на Обединетите нации, каде што викендов ќе се одржи Самит за климатските промени.

- Утрешниот протест е најважен затоа што пораката ќе се испрати дури до Њујорк, дека и во Македонија се свесни дека климатските промени претставуваат најважно прашање на 21 век и дека најмладите генерации се тие што ќе бидат жртви на одложувањето на неговото решавање. Опстанокот на човековата цивилизација зависи од наредните недели, месеци и години. Обидете се како образовен кадар да им овозможите на вашите ученици да ја доживеат возраста што ја имате вие - велат од движењето.