Сесилија Гомез има 93 години и оди во фитнес-сала пет дена во неделата, понекогаш по неколку часа. Таа вели дека нејзината рутина на вежбање, социјализирање и здрава храна ја прави да се чувствува децении помлада.
Од понеделник до петок, без исклучок, ќе ја најдете 93-годишната Сесилија Гомез во фитнес-сала. Таа е редовен член на „Голдс џим“ во Смиттаун од 10:00 до 13:00 часот секој работен ден, со децении наназад.
- Можам да речам дека речиси сум во совршена форма. Се чувствувам како да имам 50 години. Можам да играм фудбал, кошарка, што било - вели таа.
Нејзиниот совет за долг живот полн со енергија: социјализирајте се редовно, јадете здраво и, најважно, вежбајте секој ден.
Гомез вели дека е горда што е најстарата во своите групи за вежбање. Денес, нејзината типична рутина вклучува комбинација на вежби со тегови и кардио.
Гомез посетува часови преку програмата „Силверсникерс“, наменета за возрасни над 65 години. Таа неодамна ја доби наградата „Член на годината“ за својата посветеност кон фитнесот.
Фото: Cecilia Gomez
Програмата помага за развивање рамнотежа и стабилност, важни за долготрајна виталност, особено за превенција од падови, вели Анди Квапиен, инструкторка на „Силверсникерс“.
Освен вежбањето, Гомез вели дека клучот за здрав живот е и добра исхрана.
Гравот е основна храна во нејзината исхрана, често со ориз и зеленчук. Гравот е поврзан со големи придобивки за долговечност бидејќи е главен дел од исхраната во таканаречените „сини зони“, региони каде што луѓето живеат најдолго на светот.
Исто така, Гомез внесува и други плодови и зеленчук, како банани (добар извор на калиум кој го поддржува здравјето на срцето) и портокали (богати со витамин Ц за зајакнување на имунитетот). Ваквата растителна храна има витамини, минерали и влакна кои помагаат во превенција на болести како рак и кардиоваскуларни заболувања и го штитат мозокот и телото со текот на времето.
Гомез има и активен социјален живот, што нејзината ќерка го смета за клучен фактор во нејзиното добро здравје и енергија.
- Тоа е клучот за нејзината долговечност. Таа секогаш е активна со сите. Внуци, правнуци. Никогаш не е сама - вели нејзината ќерка Шнајдер.
Гомез и Шнајдер живеат заедно, а секоја недела семејството се собира за ручек. Нејзиниот социјален живот, кој ја поттикнува долговечноста, вклучува и пеење во црковниот хор и разговори со пријателите пред и по тренинг.
Заедницата е дел од тоа што ја одржува Гомез активна, обезбедувајќи чувство на цел и рутина дури и при болести.
Извор:
Businessinsider.com
Фото: Cecilia Gomez