Цената на какаото вртоглаво расте и сѐ повеќе станува луксуз. Производителите на тоа одговараат со нов тренд - пласирање производи „со вкус на чоколадо“.
Кога ќе го отворите вашето омилено чоколадо, треба да знаете дека вкусот и составот не се исти како порано. Всушност, не можете да бидете сигурни ниту дека и понатаму може да се нарече чоколадо.
На инстаграм-профилот на „Гардијан“ споделено е видео кое укажува на брендови што толку го намалиле процентот на какао во производите, што официјално смеат да ги претстават само како слатки „со вкус на чоколада“. Тоа е наведено многу суптилно на пакувањето за да не можете да го забележите.
Притоа се поставува прашањето што не е наведено на пакувањето. Производителите бараат алтернативни состојки и нови технологии со цел одржливо производство и намалување на зависноста од традиционалните зрна какао.
Причината е цената на какаото, која драстично расте и тоа не се одразува само врз цените, туку и врз квалитетот. Некои брендови преминуваат на „ароми на чоколадо“ и ги менуваат рецептите за да ги задржат производите на полиците, но повеќе не можат да ги продаваат како чоколадо бидејќи не содржат доволно какао.
Климатските промени и уништувањето шуми во Западна Африка го прават производството на какао нестабилно и еколошки скапо. Истовремено, светската побарувачка за чоколадо расте и дополнително ги оптоварува синџирите на снабдување.
- Ако сте компанија што денес користи чоколадо, тогаш сте во криза. Цените се зголемени четирипати за три години. За мали бизниси, тоа може да биде разликата меѓу опстанок и затворање - вели Марк Голдер, извршен директор на „Вин-вин“, компанија што прави чоколада без какао.
- Светот го обожава чоколадото, но какаото страда. Климатските промени ги намалуваат приносите, а околу 75 отсто од светското какао потекнува од Гана и Брегот на Слоновата Коска, каде што уништувањето шуми и детскиот труд сè уште се голем проблем - додава тој.
Компанијата на Голдер користи ферментирани житарки и мешунки, меѓу кои и ориз, за да ги реплицира вкусот, текстурата и начинот на топење на вистинското чоколадо. Процесот е сличен на класичната изработка, со ферментација и печење.
Интересот за вакви алтернативи расте паралелно со растот на цените.
- Во последните 18 месеци има вистинска експлозија на интерес. Постoјано добиваме барања од купувачи од цела Европа и пошироко - вели Голдер.
Швајцарскиот „Бери Калебаут“ соработува со Универзитетот во Цирих, каде што во лабораторија одгледуваат клетки од растенија од какао што создаваат исти масти и ароми, но без дрвја.
Германската „Пленет еј фудс“ користи овес и сончогледови семки што се печат и ферментираат, а калифорнискиот стартап „Војаж фудс“ развил производ од семки од грозје, протеини од сончоглед и шеа путер.
- Алтернативите на чоколадо произведено без какао, вклучувајќи лабораториски одгледани сорти, се дел од пошироката иновација во храната која е подобра за планетата - вели професорот Тим Спектор, коосновач на британската компанија „Зои“. Но, според него, квалитетот и здравствените придобивки се под знак прашалник.
- Нов процес не значи автоматски поздрав производ. Знаеме дека мастите во чоколадата, иако заситени, можат да бидат корисни кога се внесуваат, на пример, како темно чоколадо. Засега не знаеме дали овие нови производи ќе имаат ист ефект. Минимално преработеното какао е богато со флаваноли, кои се добри за здравјето на цревата, притисокот и срцето - вели Спектор и додава дека темното чоколадо и суровото какао се навистина здрави намирници, но предупредува дека не треба автоматски да се верува дека оваа алтернатива е подобра и поздрава.
Извор:
Nova.rs
Фото: Freepik