На околу 38,1 милиони возрасни лица во САД им бил дијагностициран дијабетес во 2021 година, според Центрите за контрола и превенција на болести. Од нив, околу 90% имале дијабетес тип 2.
Новата студија од „Џонс Хопкинс“ открива дека кај возрасни со дијабетес тип 2, од кои повеќето земале повеќе антихипертензивни лекови, диетата „ДАШ/DASH (Диетален пристап за намалување на хипертензија/ Dietary Approaches to Stop Hypertension), која подразбира помали количини на натриум, постигнува клинички значајно намалување на крвниот притисок.
Оваа диета е богата со овошје, зеленчук и млечни производи со малку маснотии и содржи пониски нивоа на заситени маснотии и холестерол. Истражувачите ја намалиле и содржината на калиум за да се осигурат дека диетата е безбедна и за оние со хронично заболување на бубрезите, што влијае врз многу луѓе со дијабетес.
-Диетата веќе подолго време е дел од стандардниот третман за хипертензија. Знаеме дека го намалува крвниот притисок, но има малку проучувања на оваа диета и намалувањето на нивото на натриумот кај лица со дијабетес. Целта на студијата беше да се развие нова верзија на диетата и да се види колку е ефикасна во намалувањето на крвниот притисок за луѓето со дијабетес. Ние ја нарековме „ДАШ 4Д“ - вели главниот автор Скот Пила.
Пила вели дека луѓето со дијабетес имаат тенденција да се фокусираат на нивото на шеќер во крвта, иако високиот крвен притисок обично влијае врз оние со дијабетес и е важна причина за појава на мозочен удар и срцеви заболувања. Целта на крвниот притисок за луѓе со дијабетес е помала од 130 со 80.
Пила вели дека секој пациент што се приклучил на студијата добил четири диети во случајно доделена секвенција:
-„ДАШ 4Д“ диета со понизок натриум
-„ДАШ 4Д“ диета со повисок натриум
-типична американска диета со понизок натриум и
-типична американска диета со повисок натриум.
Учесниците ја применувале секоја исхрана пет недели. Им била обезбедена целата храна, а нивните калории биле приспособени така што нивната тежина останала стабилна во текот на студијата.
Од 102 учесници, 85 ги завршиле сите периоди на диети. Просечната возраст била 66 години, 66 % биле жени, а 87 % биле самопријавени. Средниот основен крвен притисок бил 135/75 mmHg, а 66 % користеле два или повеќе антихипертензивни лекови.
За разлика од типичната американска диета со повисок натриум, диетата „ДАШ 4Д“ со понизок натриум го намали систолниот крвен притисок на крајот за 4,6 mmHg и дијастолниот крвен притисок за 2,3 mmHg. Поголемиот дел од намалувањето на крвниот притисок се случил во првите три недели од примената на секоја диета.
Извор:
medicalxpress.com
Фото: Freepik