Напредокот на технологијата отвора врати за нови можности за лицата со оштетен вид. Истражувачи од Универзитетот во Фрајбург, предводени од д-р Марија Асплунд, развиле минијатурен мозочен имплант за вид, опремен со електроди со големина на неврон, што би можело да им даде на слепите луѓе надеж за повторно гледање. Визионите импланти се присутни во медицината од средината на деведесеттите години на минатиот век, но претходните методи имале ограничувања поради големината на електродите и металната корозија.

Иновацијата во новите мозочни импланти лежи во микроскопските електроди, кои овозможуваат поставување поголем број електроди на еден имплант. Ова овозможува подетална стимулација на мозокот, создавајќи појасна слика за пациентите. Важноста на деталите е клучна бидејќи сликата што мозокот ја создава преку овие сигнали не е толку остра како кај луѓето со неоштетен вид. Исто така, имплантот користи специјална мешавина на материјали на база на полимер која спречува корозија и на тој начин ја продолжува издржливоста и функционалноста.

- Сега знаеме дека е можно да се направат електроди мали како неврон (нервна клетка) и да се одржи оваа електрода ефикасно да работи во мозокот долго време. Следниот чекор ќе биде создавање имплант кој ќе може да се поврзе со илјадници електроди - вели Марија Асплунд, водач на проектот и коавтор на студијата, кој е и шеф на истражувачката група за биоелектронска микротехнологија на Универзитетот во Фрајбург.

Според истражувањата, овој нов пристап ветува издржливост и ефикасност. Првичните тестови спроведени на глувци покажале дека мозочниот имплант може ефикасно да ја стимулира визуелната перцепција користејќи минимална количина електрична енергија.

Напредокот на полето на невротехнологијата ветува револуционерен напредок во лекувањето на различни невролошки состојби, вклучувајќи ги и оние што досега биле невозможни или тешки за лекување, како што се разни оштетувања на слухот и Алцхајмерова болест.

Извор: benchmark.rs

Фото: Freepik