Исклучително е малку веројатно дека џиновска вселенска карпа ќе удри во Земјата во наредните векови.
Меѓутоа, НАСА будно го набљудува небото за какви било објекти што би можеле да ја загрозат нашата планета, без разлика дали се од мал, регионален или планетарен размер. Астероидите, често мали, редовно се движат покрај Земјата - што во вселенска смисла сè уште значи неколку милиони километри подалеку. На 27 мај вселенската агенција наведе „близок пристап“ за астероидот широк речиси 2 километра означен како „7335 (1989 JA)“. Астероидот ќе ја помине Земјата на растојание од околу 4 милиони километри.
Астероидот не претставува никаква закана за Земјата. Ако имаше и најмала закана, НАСА ќе издадеше официјално предупредување до Белата куќа и другите владини агенции - што е нешто што вселенската агенција никогаш немала потреба да го направи.
Сепак, преку телескопи, големиот астероид е веќе доста видлив на ноќното небо. Проектот за виртуелен телескоп - едукативен и истражувачки астрономски подвиг кој често споделува слики од објекти кои поминуваат - штотуку сними слика од (7335) 1989 JA додека патуваше блиску до Земјата.
Фото: The Virtual Telescope Project
- Потенцијално опасниот астероид (7335) 1989 JA е речиси на безбедно, минимално растојание од нас и сега е многу светол - напиша италијанскиот астроном Џанлука Маси, кој го предводи проектот.
Како и повеќето објекти што се доволно големи или светли за да бидат видливи од милиони километри далеку, (7335) 1989 JA се појавува како светла точка на заднината на ѕвездите. На сликата подолу од 23 мај карпата е оддалечена околу 5 милиони километри.
Доколку дозволат временските услови, Проектот за виртуелен телескоп ќе го пренесува во живо поминувањето на астероидот на 26 и 27 мај.
Фото: The Virtual Telescope Project
НАСА моментално е во потрага по астероиди кои се значително помали од 1 километар, но може да претставуваат голема закана за населените области. Конгресот ѝ наложи на НАСА да најде 90 отсто од објектите блиску до Земјата широки околу 140 метри. Затоа телескопите финансирани од НАСА континуирано бараат потенцијално опасни астероиди од сите големини.
Ако астрономите ги пронајдат, тогаш можеме да се подготвиме и да преземеме нешто доколку ударот е неизбежен.
Извор:
Mashable.com
Фото: The Virtual Telescope Project