Монт Еверест е највисокиот врв во светот, но за алпинистите највосхитувачки е К2. Овој врв со „кодно“ име се наоѓа на границата меѓу Кина и Пакистан и, со 8.611 метри, е втор највисок врв на Земјата - 237 метри е понизок од Еверест.

Сепак, тој е многу поопасен, понерамен и технички потежок. Исто така, се нарекува Дива Планина - прекар што  во 1953 година му го дал американскиот алпинист Џорџ Бел откако едвај преживеал. „Тоа е дива планина што се обидува да ве убие“, рекол тој.

Совршената пирамида

Додека Еверест сè повеќе станува достапна туристичка дестинација, првенствено за богатите чии искачувања имаат малку врска со планинарење, К2 не дозволува компромиси, не познава кратенки, нема инфраструктура, скали, кабли и хеликоптери и бара врвна форма и многу вистинско планинарско искуство и техничко знаење.

Просечниот наклон на кој било правец на К2 е 45 степени, а во некои делови дури и 60 степени. Лавините, лизгањата на земјиштето и ненадејните бури се чести и смртоносни. Температурите паѓаат до -40 степени, а ветровите можат да достигнат брзина на ураган.

Како К2 го добил своето име?

До неодамна стапката на смртност на К2 беше 25 % (еден од четири), а во последниве години се намали на „само“ 13 проценти - што е сепак четири пати повисоко отколку при искачување на највисоката планина во светот. Единствената планина поопасна од К2 е Анапурна.

Планината е именувана К2 во 1856 година кога британскиот офицер Томас Џорџ Монтгомери означил два истакнати врва во венецот Каракорам со К1 и К2. Понекогаш се нарекува Маунт Годвин-Остин, по истражувачот Хенри Годвин-Остин, но тоа име никогаш не се прочуло меѓу планинарите. Локално, се нарекува Дапсанг или Чогори - Големата Планина.

Првите сериозни обиди за искачување на К2 биле направени на почетокот на 20 век. Англо-швајцарска експедиција во 1902 година поминала повеќе од два месеца на планината, но не достигнала надморска височина од 6.525 метри. Следувале експедиции во 1909, 1938, 1939 и 1953 година, но ниту една од нив не го достигнала врвот.

Први што стигнале до него, на 31 јули 1954 година, биле италијанските алпинисти Лино Лачедели и Акиле Компањони, членови на експедиција предводена од Ардито Десио. Следното успешно искачување било постигнато дури 23 години подоцна, во 1977 година, кога јапонско-пакистанска експедиција го направила истото.

Зимското искачување, кое долго време се сметаше за невозможно, се случи неодамна, на 16 јануари 2021 година, кога тим од 10 непалски алпинисти, предводени од познатиот Нирмал Пурџа, испиша историја со својот подвиг.

Поради својата убавина и бруталност, К2 има посебно значење меѓу алпинистите. Легендарниот Рајнхолд Меснер ја нарече „планина на сите планини“: „Од сите високи врвови, К2 е најубав. Како да го обликувал уметник“.

Извор: punkufer.dnevnik.hr

Фото: YouTube screenshot