Македонската музичка сцена вечерва остана без едно од своите најголеми имиња. По кратко боледување, на 65-годишна возраст почина пејачот, композитор и текстописец Владо Јаневски – автор и изведувач чии песни повеќе од три децении беа дел од животите на генерации слушатели.

Јаневски беше препознатлив по својот уникатен музички израз, емоционалните текстови и безвременските хитови како „Ако не те сакам“, „Евергрин“, „Дома си е дома“, „И тогаш некоја будала“, „Евергрин“, „Некогаш и негде“, „Црно тиквешко“, „Еден бакнеж“ и многу други, кои остануваат дел од македонската музичка антологија.

Тој ќе остане запаметен и како првиот македонски претставник на Евровизија, кога со песната „Не зори, зоро“ ја претставуваше Македонија на европската музичка сцена, отворајќи ново поглавје во историјата на домашната музика.

Со својата кариера, која траеше повеќе од четири децении, Владо Јаневски изгради дело што ќе продолжи да живее преку неговите песни. Неговата музика беше придружник на многу животни моменти - прва љубов, разделби, радости и спомени - оставајќи неизбришлив белег во македонската култура.

Заминувањето на Владо Јаневски претставува голема загуба за македонската музика, но неговото творештво ќе остане трајно сведоштво за талентот, емоцијата и уметноста што ги споделуваше со публиката.

Нека почива во мир. Збогум Владо.