Врската помеѓу мачките и нивните сопственици не е само емоционална, туку, како што покажа новото истражување, се одразува и на хормонално ниво. Научници во Јапонија открија дека сопствениците со повисоко ниво на окситоцин, хормон поврзан со општествените врски, обично имаат и мачки со покачен окситоцин. Оваа студија е прва што истовремено ги мереше нивоата на хормони кај мачките и нивните луѓе, пишува Сајенс алерт.

Хормонска слика на односот

Истражувачкиот тим се насочи на два клучни хормони. Окситоцинот има важна улога во општественото поврзување и неговото ниво може да порасне при нежен физички контакт. Од друга страна, кортизолот му помага на телото во одговорот на стрес и регулацијата на потрошувачката на енергија. Студијата, објавена во списанието „И сајенс“, покажа дека повисоките нивоа на окситоцин кај мачките се поврзани со помалку негативни емоции и понизок кортизол кај нивните сопственици. Сè уште не е сосема јасно како се воспоставуваат тие врски. Главната авторка на студијата, Сахо Такаги од Универзитетот во Кјото, смета дека галењето е едно од можните објаснувања.

- Верувам дека причината е во тоа што галењето го подигнува нивото на окситоцин и кај сопственикот и кај мачката. Таа интеракција потоа помага во изградбата на нивната врска - изјави Такаги.

Методологија на истражувањето

Иако мачките можат да развијат блиски односи со луѓето, физиологијата на таа врска е слабо истражена. Такаги и нејзините колеги во истражувањето вклучија 19 сопственици и нивните 29 мачки. Хормоналната споредба на крајот се засноваше на податоци од 24 мачки од кои можеа да се соберат примероци од урина и нивните 17 сопственици. Тимот го пресмета просекот од мерењата од три примероци од урина за секој учесник. Сопствениците пополнија и прашалник за тоа како се чувствувале изминатите недели, а мали блутут-уреди на кашичките на мачките ја бележеа нивната близина со сопствениците во домот.

Резултати и нивните ограничувања Нивоата на хормони не се директно мерило за среќа или стрес. Окситоцинот, кој се произведува во мозокот, има улога и при породување и лачење млеко, па повисоката концентрација не значи нужно и посилна врска. Истражувањето покажа дека сопствениците на мачки со повисоко ниво на окситоцин пријавиле помалку гнев, збунетост, вознемиреност и потиштеност. Но, кога тимот ги групираше податоците по домаќинства, бидејќи некои сопственици имаа повеќе мачки, статистички значајна остана само врската со збунетоста и вознемиреноста. Близината, исто така, беше поврзана со расположението. Сопствениците што минуваа повеќе време близу своите мачки искажаа повеќе енергија и виталност. Уредите за следење, меѓутоа, не можеа да откријат што точно се случувало за време на тие средби, па улогата на специфичните однесувања остана нејасна.

Нејасна врска со кортизолот

Во оваа студија не е пронајдена јасна врска помеѓу нивото на кортизол кај мачките и нивните сопственици. Тоа се разликува од студијата на кучиња од 2019 година, која откри поврзаност на кортизолот во крзното на кучето и човечката коса. Истражувачите напоменуваат дека се користени различни методи. Во новото истражување урината од луѓето е собирана наутро, додека примероците од мачките беа земани кога било можно. Разликите во времето на собирање можеа да го отежнат детектирањето на врската помеѓу нивоата на кортизол.

Отворени прашања и идни насоки

Пронајдената врска во нивоата на окситоцин не значи дека хормоните истовремено растат и паѓаат. Истражувачите ги споредуваа просечните концентрации, а не тестираа дали промените кај мачката ги следат сличните промени кај сопственикот.

- За да ја наречеме констатацијата 'синхронија', хормоните би требало да се мерат во повеќе временски точки за да се покаже дека се менуваат на сличен начин - објасни Такаги.

Студијата беше мала, а 16 од 19 сопственици беа жени. Исто така, не може со сигурност да се утврди дали мачките го намалуваат стресот кај сопствениците или, обратно, луѓето кои се чувствуваат подобро едноставно повеќе комуницираат со своите мачки.