Учителка од германскиот град Весел од 2009 година не одржувала настава, а примала плата. Се товари за измама и фалсификување исправи, а според обвинението, ја оштетила државата за околу 248.000 евра. Во случај да ја осудат, ѝ се заканува повеќегодишна затворска казна, пишува германски „Велт“.

Случајот со учителката која работела во стручно училиште се појави во јавноста минатата година и предизвика внимание и во политичките кругови на сојузната покраина Северна Рајна-Вестфалија.

Учителката уште од 2009 година повеќепати била на боледување, а надлежните власти со години не побарале лекарски преглед со кој би се проверило дали навистина е неспособна за работа. Поради тоа, покрената е и дисциплинска постапка против неа и против еден вработен во надлежниот окружен орган во Диселдорф.

Според обвинителството, учителката помеѓу март 2021 и март 2025 година му предала на училиштето десет лажни потврди за привремена спреченост за работа, иако знаела дека е способна да работи. Во март оваа година обвинителството извести и за претрес во нејзиниот дом, откако се појавија индикации дека на државата како нејзин работодавец свесно ѝ давала неточни податоци.

Дополнително ја товарат за фалсификување исправи. Според обвинителството, жената е активен нуркач и наводно сама си издала две потврди за здравствена способност за нуркање, потпишувајќи ги со лажно име од лекарка што не постои.

Во меѓувреме државава ја пензионира, но таа правно се бори против таа одлука. Дисциплинската постапка засега мирува до донесување одлука во кривичната постапка. Истражителите проверуваа и наводи дека додека била на боледување, работела како лекарка по алтернативна медицина и учествувала на конкурс за основање претпријатие, но за тие тврдења не се пронајдени конкретни докази.