Еден невработен Французин добил работа по објавувањето на снимката на која се гледа како францускиот претседател Емануел Макрон му кажува дека тој може „да го премине патот и да му најде нешто“.
Жонатан Жан бил снимен како му кажува на Макрон крај Елисејската палата за неговите тешкотии при наоѓање работа, иако аплицирал на повеќе места. Овој 25-годишен човек му кажал на претседателот дека студирал хортикултура и дека со месеци барал работа како градинар.
- Ако си енергичен и мотивиран, во хотел, кафуле, ресторан или во градежната индустрија - нема каде не сум бил, а луѓето да не ми речат дека бараат работници. Хотели, кафулиња, ресторани... Можам да го преминам патот и да ви најдам нешто. Едноставно сакаат луѓе што се подготвени да работат - му рекол Макрон.
Откако снимката стана популарна на интернет, од една агенција за привремено вработување му се јавиле на младиот човек и му понудиле да работи како возач на автобус.
- Среќен сум затоа што ќе работам нешто што го сакам - истакнал Жан за една француска телевизија, која пренесе и дека му биле понудени 20 други работи, но тој ги одбил.
Советот на Макрон предизвика наплив од критики на интернет, а некои од нив беа насочени кон инсистирањето на претседателот дека има многу слободни работни места и покрај 9-отстотната стапка на невработеност во земјата. Други, пак, го исмеваа советот на Макрон со
мемиња.