При истражување на животот на мечките во дивината била поставена камера со која било снимено свирепо убиство на црна мечка и нејзините мечиња, кои биле во зимски сон, на Алјаска.

На снимката може да се видат таткото Ендрју Ренер и неговиот син Овен како на скии ѝ приоѓаат на мечката на островот Естер и пукаат во неа додека малите преплашено пискаат.

Убиството се случило минатата година, а властите од Алјаска го објавиле видеото на барање на организацијата „Хјуман сосајети“.

Откако ја извлекле убиената мечка, таткото и синот го славеа својот „успех“.

- Никогаш нема да можат да го поврзат ова со нас - вели едниот од нив.

Синот потоа се фотографирал со убиената мечка.

На снимката може да се види како таткото и синот по два дена се враќаат на местото на злосторството за да ги соберат чаурите и телата на мечињата.

Убивањето мечки со мали мечиња е противзаконско на тоа подрачје. Ендрју е осуден на пет месеци условно и парична казна од 20 илјади долари. Исто така, запленети му се оружјето, скиите и возилото што го користел. Овен е осуден условно на затворска казна и на добротворна работа. На двајцата им се одземени дозволите за лов, на 10 и на 2 години.