- Не ми беше јасно зошто секогаш треба согласност од Министерството за финансии за вработувања во здравство. Некој ќе се пензионира, друг ќе си оди од државата или ќе се префрли во друга клиника, зошто по автоматизам не можат да се надополнуваат тие места? Ние одлучивме, а имаше и разбирање од министерот за финансии, Министерството за финансии веќе да не одлучува за вакви случаи. Самите институции да имаат законска одговорност и Министерството за здравство да потврди без да бараме согласност во Финансии. Ако има резервирано таков буџет во сите здравствени клиники, тогаш нема потреба да се побара од Финансии - појасни Меџити.

Ги скратуваме овие процедурални, административни маки, нагласи тој.

- Ни одземаат многу време и не ни се корисни. Барам тоа што треба во здравството да биде подобро и порелаксирано и да ги поедноставиме овие процедури, подвлече министерот.

На новинарско прашање за проблемите за кои се укажува во однос на тоа дека во една јавна здравствена установа нема термин за операција наутро, но во истата здравствена институција, доколку пациентот плати приватно, може да се направи операција, министерот рече да се пријави за која клиника станува збор, а тој веднаш ќе прати инспекција.