Преку анализа на податоци собрани со вселенскиот телескоп „Кеплер“ на НАСА, Мишел Кунимото, докторанд по астрономија при Универзитетот во Британска Колумбија, открила докази за импресивни 17 нови егзопланети - вклучувајќи и свет со прилично иста големина како Земјата најден во „зоната погодна за живеење“, регион околу ѕвезда каде што можеби постои течна вода.

- Оваа планета е оддалечена околу илјада светлосни години, па нема наскоро да стигнеме таму. Но, ова е возбудлив пронајдок бидејќи досега има само 15 мали потврдени планети во зоната погодна за живеење во податоците од „Кеплер“ - истакна Кунимото.

За да ги најде планетите, таа користела „метод на транзит“, еден од најкористените методи за ловење планети.

- Секогаш кога планета ќе помине пред ѕвезда, таа блокира дел од светлината на таа ѕвезда и предизвикува привремено намалување на светлината на ѕвездата. Преку наоѓање на овие транзити можете да почнете да ги составувате информациите за планетата, како нејзината големина и колку време е потребно да орбитира - објаснува таа.

Планетата слична на Земјата е околу 1,5 пат поголема од нашата планета и има орбита поголема од онаа на Меркур. Но, добива само околу третина од светлината што Земјата ја добива од Сонцето.