Истражувањата покажуваат изненадувачка врска помеѓу крвната група и ризикот од мозочен удар, при што луѓето со специфична подгрупа на крвна група А имаат поголема веројатност за мозочен удар пред 60. година.
Ова откритие го продлабочува нашето разбирање за тоа како уникатниот биолошки состав може да влијае врз здравјето.
Веројатно сте слушнале за крвните групи А, Б, AБ и O, кои се однесуваат на различни хемиски маркери, наречени антигени, присутни на површината на нашите црвени крвни клетки.
Дури и во рамките на овие главни крвни групи постојат суптилни варијации предизвикани од мутации во гените кои учествуваат.
Истражувачите анализирале податоци од 48 генетски истражувања, кои вклучувале приближно 17.000 пациенти со мозочен удар и речиси 600.000 контроли без мозочен удар. Сите учесници биле на возраст од 18 до 59 години.
Резултатите покажале јасна врска помеѓу генот одговорен за подгрупата А1 и раниот почеток на мозочен удар.
Геномско истражување открило две локации кои се тесно поврзани со поголем ризик од мозочен удар. Едната се совпаѓа со местото каде што се гените за крвната група.
За оние со ген за група O1, ризикот бил 12 отсто помал.
Сепак, истражувачите напоменале дека дополнителниот ризик од мозочен удар кај луѓето со крвна група А е мал, па нема потреба од дополнително внимание или скрининг во оваа група.
- Сè уште не знаеме зошто крвната група А би имала поголем ризик. Но, веројатно е поврзано со факторите на згрутчување на крвта, како тромбоцити и клетки кои го обложуваат крвниот сад, како и други протеини во циркулација, кои играат улога во развојот на крвни згрутчувања - вели васкуларниот невролог Стивен Китнер од Универзитетот во Мериленд.
Иако резултатите звучат загрижувачки, важно е да се стават во контекст.
- Потребни се повеќе истражувања за да се разјаснат механизмите на зголемениот ризик од мозочен удар - рече Китнер.
Друг клучен наод од истражувањето дојде од споредба на луѓе кои доживеале мозочен удар пред 60. година со оние што го доживеале по 60. година.
За ова, истражувачите користеле податоци од приближно 9.300 лица над 60 години со мозочен удар и околу 25.000 контроли над 60 години кои немале мозочен удар.
Тие откриле дека зголемениот ризик од мозочен удар кај крвната група А станува незначителен кај групата со подоцнежни удари, што сугерира дека мозочните удари во раната возраст може да имаат различен механизам од оние што се случуваат подоцна во животот.
Мозочните удари кај помлади лица поретко се предизвикани од таложење на масни наслаги во артериите (процес наречен атеросклероза), а почесто од фактори поврзани со формирање на згрутчувања, велат авторите.
Истражувањето открило и дека луѓето со крвна група Б имале околу 11 отсто поголема веројатност за мозочен удар во споредба со контролната група, без оглед на возраста.
Генетската секвенција за крвните групи А и Б, исто така, е поврзана со малку поголем ризик од згрутчување на крвта во вените, познат како венска тромбоза.
Извор:
Science Alert
Фото: Freepik