„Гугл“ ги најави плановите за исклучување на своите алатки базирани на вештачка интелигенција за учениците од основните и средните училишта почнувајќи од следната година. Таа опција ќе биде стандардно поставена сè додека училишните администратори не одлучат да ги вклучат тие функции.

Промената наводно доаѓа по низа консултации со училиштата, наставниците, истражувачите и креаторите на образовните политики. Поради тоа, „Гугл“ го менува својот пристап кон низа производи, вклучувајќи ги Џемини, НоутбукЛМ, Џемини ин класрум и самиот пребарувач.

Одлуката на училиштата да им се овозможи целосно блокирање на вештачката интелигенција со себе носи прилично радикална последица. Имено, образовните установи што ќе се одлучат на тој чекор повеќе нема да можат да пристапуваат до пребарувачот на „Гугл“. Причината за тоа е фактот што ВИ-функциите сега се длабоко и нераскинливо интегрирани во самиот механизам на пребарување.

Крис Филипс, потпретседател за образование во „Гугл“, објасни за странските медиуми како пребарувањето и вештачката интелигенција се тесно поврзани. Тоа во практика значи дека учениците во училиштата што ќе ја забранат ВИ ќе останат без пристап до пребарувачот и наместо резултати, ќе видат само порака дека услугата не е достапна.

Ваквиот развој на настаните ги става наставниците и директорите во многу незгодна положба. Иако многу просветни работници не сакаат учениците да користат ВИ резимеа во пребарувачот за пишување домашни задачи и спроведување истражувања, и понатаму им е многу потребен основниот пристап до пребарување на вебот за да пронајдат извори и други материјали за учење.