Неколку десетици шишиња врвно француско вино во саботата беа испратени на Меѓународната вселенска станица, но нема да бидат наменети за астронаутите, туку за научни цели – ќе се проучува како виното созрева во вселената.

Црвеното „бордо“ ќе остане една година таму, доволно за да се согледа како бестежинската состојба и вселенската радијација влијаат врз созревањето на виното. Целта, меѓу другото, е да се развијат и нови вкусови и својства во оваа гранка на прехранбената индустрија.

Во ова истражување учествуваат универзитетите на Бордо и Баварија.

По враќањето на Земјата, виното ќе се спореди со тоа што било отстоено во земни услови.