Планинарењето во некои делови од светот стана сè поопасно поради климатските промени, предупредуваат научниците и експертите.
Глобалното затоплување ја намали ледената и снежна прекривка на Алпите, што резултира со чести одрони на камењата и лизгање на земјиштето.
И топењето на глечерите ги зголемило предизвиците на планинарите. Некои планинарски патеки се напуштени или изменети поради зголемените ризици, а на некои локации сезоните за искачување се променети.
Истражувањата за плановите за планинарење на масивот Мон Блан покажале многубројни промени. Речиси сите маршрути за регионот биле погодени со промени од 70-тите години и неколку патеки повеќе не постојат.
- Сè потешко е да се предвидат временските услови за искачување на овие патеки, а тие стануваат и поопасни - изјави Жак Мори од Универзитетот „Гренобил Алпс“.
Истражувањето спроведено од француски тим во 2017 година. во кое биле вклучени неколку врвови на масивот Мон Блан, открило значителна деградација на вечниот мраз помеѓу 1850 и 2015 година.
Тоа предизвикало падините да станат нестабилни и да настане одронување на земјиштето.
- Голем дел од овие искачувања станаа исклучително опасни. Многу традиционални искачувања на мраз во источните Алпи се погодени од одрони од карпи и камења, како и паѓање на камења од ледените зони при крајот на летото или есента - вели Флорија Ритер од Универзитетот во Виена.
- И водичите ги снимија опасностите што го загрозуваат целиот планински венец - вели коавторот на истражувањето, Арнауд Треме, географ на Универзитетот „Вагенинген“ во Холандија.
Во последните 10 години мрежата за безжични сензори на Матерхорн испраќа податоци за условите на карпите, вечниот мраз и климатските услови.
- Врз основа на податоците што ги добиваме, можеме да видиме дека темпото на промени е прилично брзо. Како резултат на тоа, на некои места повеќе не можеме да се искачуваме - вели Јан Беутел, научник од Цирих.
Експертите и водичите велат дека искачувањата стануваат многу потешки и потребно е приспособување.
- Одроните на камењата стануваат најголем предизвик. Влијанието на изменетата клима е различно - на некои планини е огромно, а на други не - вели претседателот на Меѓународната федерација на планински водичи, Кристијан Тромсдорф.
Иако има малку истражувања спроведени на
Хималаите, планинските водичи велат дека искачувањата стануваат поопасни и дека тенкиот мраз што ги покрива карпите е особено опасен.