Речиси три четвртини (74 проценти) од возрасните Американци пријавуваат дека понекогаш, секогаш или често доживуваат нарушен сон поради стрес, според Американската академија за медицина на спиењето.
Тоа воопшто не е изненадувачки податок - превртувањето додека се обидувате да го контролирате вашиот забрзан ум не е баш погодно за добро спиење. Експерт за спиење ја истакнува штетата што стресот може да му ја нанесе на нашето здравје.
Иако стресот може да биде корисен во кратки налети - тоа е нашиот инстинкт за преживување, може да направи повеќе штета отколку корист кога станува збор за спиењето. Експертот за здравје и благосостојба на спиењето Ерик Риденур објаснува дека иако несоницата понекогаш е неизбежна, луѓето често го доживуваат она што е познато како несоница предизвикана од стрес.
- Она што треба да го разбереме е дека стресот и спиењето се биолошки поврзани. Кога стресот се зголемува, системите за будење во мозокот остануваат активни. Тоа значи дека дури и ако вашето тело е уморно, вашиот мозок може да биде премногу буден за да заспие. Со текот на времето ова несовпаѓање го тренира мозокот да го поврзува времето за спиење со фрустрација, а не со одмор – објаснил тој.
Влијание на стресот врз сонот
Спроведената студија открила колку длабоко стресот го саботира нашиот сон. Оние што доживуваат умерен до висок стрес пријавиле појава на несоница - се борат да заспијат додека нивните умови забрзано работат. Дури и кога успеале да заспијат, тоа било пократко и помалку регенеративно бидејќи вкупното времетраење на спиењето се намалило за 1,5 час навечер кај лицата со хроничен стрес.
Уште полошо, РЕМ-фазата (брзо движење на очите) - клучната последна фаза каде што мозокот ги обработува емоциите - била значително намалена. Ова резултира со скок во раздразливоста, заборавеност и недосиг на мотивација.
Студијата, исто така, открила дека кортизолот, примарниот хормон на стрес во телото, останал покачен дури и два часа по спиењето, што го отежнува опуштањето. Во суштина, стресот го тера телото да реагира како да е во физичка опасност, но како што објаснува истражувањето, активаторот е ментален, а заканата никогаш не завршува.
Како подобро да спиете кога сте под стрес
За среќа, постојат голем број практични чекори што можете да ги преземете за да ви помогнат подобро да спиете, дури и кога имате многу работи на ум. Голем дел од тоа е вклучено во креирањето ноќна рутина.
Прво, престанете да проверувате е-пошта и известувања од работа по одредено време. Потоа, запишете ги вашите мисли или направете список со обврски пред спиење за да го разјасните умот.
Друг одличен совет е да создадете тампон-зона околу 30 минути до еден час пред спиење каде што ќе ги отстраните екраните и другите потенцијални предизвикувачи на стрес.
Кога е време да се смирите, погрижете се вашата спална соба да биде темна, ладна и без предмети што ви го одолговлекуваат вниманието. Доколку е потребно, пробајте со бел шум или други смирувачки звуци.
Важно е да се обидете да се држите до постојан распоред за спиење и будење, дури и за време на викендите. Колку и да е тешко да се спроведе, навистина прави разлика.
Извор: unilad.com
Фото: Freepik