Германија мора да ангажира повеќе странски работници за да го зачува економскиот раст и просперитет, покажува истражувањето на економскиот институт IW. Подемот на германскиот пазар на труд во изминатите години веројатно не би бил можен без доселувањето, истакнуваат од институтот.

Во Германија од јули 2012 до јуни 2017 година се вработиле 1,3 милион странци, наспроти 1,6 милион Германци. Најголемиот дел од доселениците што работат во Германија потекнуваат од Европската Унија, а 386.000 од трети земји.



Авторите на извештајот предупредуваат дека стапката на невработеност меѓу Германците би можела да се зголеми, констатирајќи дека може да се очекува значително намалување на уделот на домашното население во работната сила во наредната деценија.

Од институтот, исто така, предвидуваат дека најверојатно во иднина Германија повеќе ќе зависи од државјани од трети земји, со оглед на тоа дека доселениците во Германија од другите земји на ЕУ ќе треба да се вратат за работа во матичните земји, чии пазари на трудот исто така трпат последици поради стареењето на населението.