Вкупно 113 училишта доставиле барање за одржување настава со физичко присуство до владината комисија. 79 од нив стигнале од основните, а 34 од средните училишта. Овие барања се поднесени од основни и средни приватни и државни училишта од земјава. Според податоците на МОН, во Македонија има 494 училишта.

До 10 септември училиштата имаа можност да достават барање за физичка настава, но МОН објаснува дека сè уште пристигнуваат документи по пошта.

Одлуката колку од училиштата ги исполнуваат условите за физички да ги примат учениците од четврто одделение нагоре ќе ја донесе комисијата, во зависност од можностите на објектите, но и врз основа на епидемиолошката состојба со Kовид-19 во општината во која се наоѓа училиштето.