Во Македонија пристигна првата пратка на вакцини против Ковид-19 од Република Србија. Станува збор за 4.680 од вкупно 8.000 вакцини од компанијата „Фајзер“, соопшти Министерството за здравство.

- Вакцинацијата ќе почне в среда со здравствените работници во модуларната клиника во Клиничкиот центар во Скопје – изјави министерот за здравство Венко Филипче.

Вакцинацијата ќе се одвива во три фази согласно утврдениот Национален план за имунизација на населението. Во првата фаза, предвидено е да се вакцинираат здравствените работници кои се во првата линија на одговор во болнички услови со висок и многу висок ризик за стекнување и пренесување инфекција. Во оваа фаза, предвидено е да се вакцинираат и следните приоритетни групи: постари возрасни лица со висок ризик да развијат болест, компликации и смрт исход, дефинирани со ризик врз основа на возраст, лица постари од 70 години.