Водечките преработувачи на какао во Брегот на Слоновата Коска и Гана ја прекинаа работата бидејќи не можат да си дозволат какао, предупредуваат трговците, а процените на производителите се дека овогодишниот род би можел да биде послаб за повеќе од 10 отсто.
Светските цени на какаото пораснаа и на почетокот на февруари достигнаа рекордни 5.874 долари за тон на суровинскиот пазар во Њујорк, јави Би-би-си.
Тоа значи дека тие биле речиси двојно повеќе од пред една година. Какаото поскапи поради лошиот род во Западна Африка. Под влијание на временскиот феномен Ел Нињо, врнежите се намалија во Гана и Брегот на Слоновата Коска, два од најголемите светски производители кои произведуваат речиси 60 отсто од какаото во светот. Во насадите има суша.
-Побарувачката мора нагло да ослабне за да фати чекор со понудата - објаснува глобалниот експерт за какао на Тропикал Рирч Сервисес (Tropical Research Services), Стив Вотериџ.
Производителите на чоколадо не можат да направат чоколада од сирово зрно какао и се потпираат на преработувачите кои ги претвораат зрната во путер и ликер.
Сепак, преработувачите велат дека какаото им е прескапо. Државниот преработувач на Брегот на Слоновата Коска, „Транскао“, соопшти дека повеќе не купува какао поради високата цена. Сè уште ни снемува резерви, додаваат тие, без да дадат бројки. Два индустриски извори, кои побараа да не бидат именувани, рекоа дека погонот речиси целосно запрел.
Еден од двата извори рече дека повеќе големи државни погони во Брегот на Слоновата Коска, кој произведува речиси половина од какаото во светот, наскоро би можеле да бидат затворени. Според изворот, дури и глобалниот трговец „Каргил“ има проблеми да купи зрна какао за големиот погон за преработка во Брегот на Слоновата Коска, кој беше затворен една недела во февруари. „Каргил“ не ја коментираше информацијата.
Во Гана, вториот по големина светски производител на какао, повеќето од неговите осум фабрики, вклучително и онаа на државната компанија за преработка ЦПЦ, повеќе пати ја прекинуваа работата на повеќе недели од почетокот на сезоната во октомври, рекоа два извори од секторот.
ЦПЦ соопшти дека поради недостиг на зрна какао, работи со капацитeт од околу 20 отсто. Меѓународната организација за какао (ICCO) очекува глобалното производство да падне за 10,9 отсто оваа сезона, на 4,45 милиони метрички тони.
Извор: МИА