Довербата е „општествено лепило“. Таа ги поврзува заедниците, ги обликува институциите и ја поттикнува економската активност.

Инфографиконот на „Visual capitalist“ рангира 90 држави според процентот на возрасни кои се согласуваат со изјавата: „На најголемиот дел од луѓето може да им се верува“.

Рангирање: Земји со најмногу и најмалку меѓусебна доверба

Данска се најде на првото место со 74 отсто, а веднаш зад неа се Норвешка со 72 отсто и Финска со 68 отсто. Истражувањето се базира на 1.000-1.500 интервјуа по држава. Учесниците одговарале на прашањето „дали може да им се верува на повеќето луѓе“ или треба „многу да се внимава“.


Просечна доверба во англофонските земји и Западна Европа

Англиското говорно подрачје се наоѓа во средниот дел на листата: Нов Зеланд (57 отсто) и Австралија (49 отсто) имаат повисоки нивоа на доверба, Канада (47) отсто, Обединетото Кралство (43 отсто), САД (37 отсто). Слична е состојбата и во Западна Европа: Швајцарија (59 отсто) и Холандија (57 отсто) стојат подобро, додека Германија (42 отсто), Франција (26 отсто) и Италија (27 отсто) значително заостануваат.

Разликите во довербата се поврзуваат со социјалните нееднаквости и политичката поларизација.

Општества со ниска доверба

Латинска Америка има најмногу држави кои се на дното од табелата: Перу (4 отсто), Никарагва (4 отсто), Колумбија (5 отсто) и Еквадор (6 отсто).

Политичката нестабилност, високата стапка на криминал и економските кризи сериозно ја нарушуваат меѓусебната доверба. На Блискиот Исток, Ирак (11 отсто), Либан (10 отсто) и Египет (7 отсто) исто така бележат многу ниски нивоа поради долгогодишни конфликти и слабости во управувањето.

Извор: Visual Capitalist
Фото: Visual Capitalist