Полека се составува актерската екипа за филмот „Господарот на прстените: Потрагата по Голум“, со што „Ворнер брос“ официјално го претстави следното поглавје од враќањето во светот на Средната земја.

Во овој легендарен универзум првпат ќе зачекорат Лео Вудал, ѕвездата на серијата „Еден ден“, Џејми Дорнан, познат по филмот „Педесет нијанси сиво“, и британската актерка Кејт Винслет.

Големата вест е објавена на овогодишниот „Синемакон“, престижен собир на филмската индустрија, на кој продуцентските куќи традиционално ги претставуваат најважните проекти.

Публиката нема да мора долго да чека - премиерата на филмот е закажана за следната година, кога Средната земја повторно се враќа на големото платно.

Лео Вудал ќе го игра Халвард

Продолжението на сагата од серијалот „Господарот на прстените“, во режија на Енди Серкис, ќе ја следи раната потрага на Арагорн по Голум, со цел да се сокрие локацијата на прстенот од моќниот и мрачен Саурон.

Британскиот актер Лео Вудал е ново лице во франшизата и ќе го толкува ликот на Халвард. Овој 29-годишник ѝ го привлече вниманието на публиката со улогите во серијата „Белиот лотос“, романтичната драма „Еден ден“, како и филмот „Бриџит Џонс: Луда по него“.
Кејт Винслет како Маригол

Кејт Винслет, наградувана актерка и ѕвезда на филмот „Титаник“, ја доби главната женска улога. Таа ќе го толкува ликот на Маригол.

Според „Дедлајн“, не бил залуден трудот на Енди Серкис (кој го глуми Голум) и продуцентот Питер Џексон во убедувањето на Кејт Винслет да ја прифати улогата. Џексон и Винслет се познаваат одамна бидејќи Винслет глумеше во неговиот филм „Небесни суштества“.

„Потрагата по Голум“ се одвива истовремено со првите неколку поглавја на Дружината на прстенот, а во таа ера нема многу главни женски ликови.

Франшизата „Господарот на прстените“ со години важи за една од најуспешните во историјата на филмската индустрија, со околу 3 милијарди долари заработка на киноблагајните во светот.