Температури во рамките на просекот и количество врнежи со потпросечни вредности за околу 25 проценти може да очекуваме есенва. Недостиг на врнежи особено ќе има во западните делови од државата и до 50 проценти, покажува сезонската прогноза што ја објави денеска Управата за хидрометеоролошки работи (УХМР).

Во првиот месец од есента во најголем дел од државава ќе имаме просечна температура на воздухот од 14 до 16 степени. Потопло, со средна месечна температура од 16 до 18 степени ќе биде во Скопско-Кумановскиот Регион, како и во Гевгелиско-Струмичкиот Регион, додека најниска месечна температура, од 10 до 12 степени, ќе имаат повисоките планински области од Северозападниот Регион. Споредено со просечните многугодишни вредности, потопло од вообичаено ќе биде во северните делови од државава, додека во најголемиот дел септемвриските температури ќе бидат со вообичаени вредности.

Според УХМР, количеството на врнежи за септември се очекува да изнесува од 25 до 50 литри на квадратен метар, а во југоисточните делови од 10 до 25 литри на квадратен метар. Се прогнозира недостиг на врнежи во западните делови за 25 до 50 проценти, а во источните до 25 проценти.

Средната температура во септември, октомври и ноември на целата територија, според прогнозата, ќе изнесува од 10 до 12 степени, освен во крајните северозападни планински подрачја, за каде што се прогнозираат 8 до 10 степен.

Очекуваните врнежи за оваа есен ќе изнесуваат од 75 до 150 литри на квадратен метар, односно од 25 до 50 за секој месец поединечно.

Управата за хидрометеоролошки работи, во рамките на своите законски надлежности, изработува редовни сезонски и месечни климатски изгледи, во соработка со Светската метеоролошка организација и други меѓународни организации.