Ако некогаш сте се прашувале колку чини еден вселенски костим, одговорот може да ве изненади. Костимот што го носат астронаутите на НАСА достигнува цена од дури 12 милиони долари.
Најголемиот дел од оваа сума, всушност, не е за самиот костим кој им овозможува на астронаутите да преживеат во вселената. Околу 70 отсто од цената оди за „ранецот“ и контролниот модул, кој буквално е линија на живот за патниците во вселената.
Оваа софистицирана опрема не е само парче ткаенина и пластика, туку минијатурна вселенска станица во форма на ранец. Во него се наоѓаат системи за дишење, регулација на температурата, отстранување на јаглеродниот диоксид и електронска контрола на сите функции што овозможуваат астронаутот безбедно да престојува надвор од вселенскиот брод.
Ранецот содржи и резервни системи за случај на дефект, обезбедувајќи двојна заштита во екстремни услови.
Преостанатите 30 отсто од цената се однесуваат на самиот костим - повеќеслојни материјали отпорни на микрометеорити, зрачење и температурни осцилации кои во вселената можат да достигнат и 250 Целзиусови степени.
Развојот и усовршувањето на вселенските костими трае со децении и бара огромни инвестиции во тестирање, материјали и инженеринг.
Иако звучи скапо, вселенскиот костим е вистинско технолошко чудо што му обезбедува на астронаутот услови слични на Земјата - кислород, стабилна температура, притисок и комуникација со базата.
Високата цена ја одразува огромната работа на тимови од научници, инженери и техничари кои стојат зад секој детаљ. Без ранецот и контролниот модул, астронаутот не би можел да преживее ни неколку минути во вселената. Секој долар вложен во вселенскиот костим е инвестиција во безбедноста и опстанокот на човекот надвор од нашата планета.
До милијарда долари
Првиот Американец во вселената, астронаутот Алан Б. Шепард, на 5 мај 1961 година го носел костимот наречен „Меркур“, а го користеле уште шест астронаути пред костимот да замине во пензија.
Во наредните децении се развиле повеќе видови вселенски костими, сите со подобрен дизајн и функционалност. Според податоците, уште во 1974 година еден вселенски костим чинел од 15 до 22 милиони долари, што во денешни пари изнесува од 83 до 122 милиони долари.
НАСА планира нови мисии на Месечината и други планети, па костимите мора да ги следат идните технички барања. Некои прогнози се дека следната генерација костими може да чинат милијарда долари.
Извор:
Rtcg.me
Фото: Screenshot/YouTube