Користејќи квантни компјутери и вештачка интелигенција (ВИ), меѓународна група на научници предводена од академиците Игор Штагљар и Алан Аспуру-Гузик од Универзитетот во Торонто открила потенцијален прототип на лекови за лекување рак. Целта на овој иновативен пристап се т.н. КРАС-мутирани гени поврзани со карциномите кои се меѓу најтешките за лекување.

- Традиционалниот процес на откривање лекови трае помеѓу 10 и 12 години и вклучува тестирање на илјадници различни хемиски соединенија кои мора физички да постојат. Од тие 12 години, приближно пет до шест се трошат на претклинички истражувања, кои вклучуваат тестирање на клетки на пациенти и експериментални животни. Нашиот нов хибриден пристап ги комбинира квантните компјутери и вештачката интелигенција (ВИ), овозможен во „ин силико“, т.е. компјутерска анализа, на повеќе од милион целосно нови молекуларни структури за само четири месеци - истакнува Игор Штагљар, професор по молекуларна генетика и биохемија и директор на Универзитетот во Торонто.

-Со тоа значително се крати времето потребно за идентификување на перспективните кандидати, т.н прототипови на лекови, овозможувајќи побрза транзиција кон претклиничко тестирање. Овој пристап брзо ги идентификува ветувачките соединенија и ги елиминира оние што не функционираат, а со тоа го забрзува развојот на потенцијалните терапии - додал Штагљар.

Во соработка со лабораторијата на Алан Аспуру-Гузик на Универзитетот во Торонто и „Инсилико Медисин“, водечка биотехнолошка компанија која користи генеративна вештачка интелигенција (ВИ), тимот на Штагљар се фокусирал на КРАС-мутациите бидејќи тие се присутни во 20 проценти од сите тумори, вклучително и ракот на белите дробови, на панкреасот и на дебелото црево и често се поврзуваат со лоша прогноза.

- КРАС-мутациите играат клучна улога во развојот и прогресијата на различни видови рак. Покрај тоа што се поврзани со поагресивни форми на болеста, тие се особено предизвикувачки за развој на лекови бидејќи мутираниот КРАС-ген кој ги кодира овие мутации долго време се сметаше за „недостапен“ за традиционалните методи за откривање лекови. Нашата одлука да се фокусираме на мутациите се заснова на нивната клиничка важност и фактот дека тие се меѓу најтешките терапевтски цели во онкологијата со децении. Развојот на терапии кои можат ефикасно да ги таргетираат мутираните верзии на протеинот КРАС може да го трансформираат третманот на ракот, особено за пациентите со ограничени терапевтски опции - објаснил Штагљар.

Тој истакнува дека квантните компјутери и вештачката интелигенција веќе ги трансформираат биомедицинските истражувања, овозможувајќи прецизно моделирање на биолошките системи, рано откривање болести, нови терапевтски цели и персонализација на терапии.

Извор: jutarnji.hr

Фото: John Mcgraw