На 31 август и на 1 септември ќе се спроведе пријавувањето за упис во прва година на најстариот универзитет „Св. Кирил и Методиј“ во Скопје. Поднесувањето на документите за упис на факултетите ќе се одвива онлајн. На УГД уписите се во тек од 24 август и ќе траат до 1 септември. Од денеска до 1 септември се поднесуваат документи на Универзитетот „Св. Климент Охридски“ – Битола – УКЛО.

На факултетите и институтите при УКИМ, прелиминарната ранг-листа со резултати од успехот од средно образование ќе биде објавена на 3 септември, додека конечната ранг-листа ќе биде објавена на 7 септември. Примените кандидати ќе се запишуваат на 10 и на 11 септември.

- Кандидатите можат да се пријават в понеделник и во вторник до 16 часот, односно ќе треба да ги пратат преку е-пошта скенирани документите во системот за електронска поддршка IKnow. Потоа ќе има прелиминарна ранг-листа, а потоа пак, по одреден протокол ќе ги носат оригиналните документи - информира проф. д-р Ратко Дуев, декан на Филозофски факултет.


На штипскиот Универзитет „Гоце Делчев“ годинава има 3.831 слободно место за новите бруцоши што ќе се запишат на некој од 12 факултети и трите академии.
На штипскиот универзитет студентите доставуваат документи со физичко присуство од 24 август до 1 септември, тоа е официјалниот рок. Претходно, од 1 јули секој кандидат можеше да се пријави во електронски систем, во кој си креира профил и внесува лични податоци. Универзитетското раководство било флексибилно, па дозволило кандидатите да донесат документи и пред рокот и затоа во голем дел веќе документите се доставени. Како што информира професорот Мишко Џидров, конечни резултати за примени кандидати ќе има на 4 септември. Вели дека има интерес за сите факултети.

Според конкурсот за упис на нови студенти на УКЛО, во академската 2020/2021 година на 11 високообразовни институции слободни се 2.697 места.