Со помош на класичен психолошки тест научниците покажаа дека азиските слонови имаат многу силна способност за контрола на импулсите.
Тим предводен од психолозите Сидни Хоуп и Џошуа Плотник тестира 16 азиски слонови на возраст од 4 до 60 години на Тајланд. Животните мораа да стигнат до овошјето сместено во проѕирна кутија.
Слоновите можеа да ја видат и да ја намирисаат храната низ мали отвори на предната страна, но не можеа директно да ја дофатат. За да стигнат до неа, мораа да го потиснат импулсот да посегнат директно кон овошјето и да ја заобиколат кутијата, наоѓајќи го отворот од другата страна, пишува „Сајенс алерт“.
Истражувачите очекуваа дека проѕирната препрека ќе ги збуни животните, но слоновите брзо ја заобиколуваа, што би можело да укажува на многу развиена инхибиторна контрола.
Сепак, научниците ја оставаат можноста дека проѕирната површина едноставно не предизвикала доволно силен импулс кај животните.
Кога истражувачите ја променија позицијата на кутијата така што отворот повеќе не беше на местото на кое слоновите беа навикнати, на животните им требаше повеќе време да ја пронајдат храната, но на крајот успеваа да го решат проблемот.
Забележано е и дека постарите слонови потешко се приспособуваа на промените, што би можело да укажува на слабеење на когнитивните способности со годините.
Научниците наведуваат дека резултатите се во согласност со претходните докази за врската помеѓу големината на мозокот и способноста за контрола на импулсите кај различни животински видови.
Истражувањето е објавено во списанието „ПЛОС Уан“.