Белгискиот овчар што го одбрани поранешниот американски претседател Барак Обама од натрапници во Белата куќа е одликуван со Орден за заслуги, кој го доделува британската ветеринарна добротворна организација ПДСА.

Кучето Хурикејн (Hurricane), чие име во превод значи Ураган, е прво животно од странство што ја добило таа награда, која ќе му биде врачена на церемонија во Лондон во октомври годинава.

Хурикејн, кој некогаш работеше за тајната служба, во октомври 2014 година ги пресретна насилниците што ја прескокнаа оградата на Белата куќа.

Еден од нив го удирал и шутирал кучето, но тоа го соборило и го влечело по земја, па на тој начин им овозможило на агентите од тајната служба да го фатат. Благодарение на него, Обама, кој во тоа време бил во Белата куќа, не беше повреден.