Во услови на продлабочување на еколошката криза и акутен недостиг на вода, Техеран повеќе не може да остане главен град на Иран, според изјавата на претседателот на земјата.
- Ситуацијата во Техеран е резултат на совршена бура од климатски промени и корупција - вели Мајкл Рубин, политички аналитичар од Американскиот институт за претприемништво.
- Веќе немаме избор - истакнал иранскиот претседател Масуд Пезешкијан.
Иранските власти размислуваат за преместување на главниот град на јужниот брег на земјата. Но, експертите велат дека предлогот не ја менува реалноста за речиси 10 милиони луѓе што живеат во Техеран и кои сега страдаат од последиците од деценискиот проблем со снабдувањето со вода.
Уште од 2008 година научниците предупредуваат дека неконтролирано пумпање подземни води за градот и за земјоделството брзо ги исцрпува водоносните слоеви на земјата. Прекумерната употреба не само што ги исцрпила подземните резерви, туку и ги уништила бидејќи земјиштето се компресирало и неповратно потонало. Една неодамнешна студија покажала дека централното плато на Иран, каде што се наоѓаат поголемиот дел од водоносните слоеви на земјата, тоне за повеќе од 35 сантиметри секоја година. Како резултат на тоа, водоносните слоеви губат околу 1,7 милијарди кубни метри вода годишно бидејќи земјата е трајно потисната, не оставајќи простор за подземно складирање вода за обнова, според Дарио Солано, геонаучник од Националниот автономен универзитет во Мексико.
Други големи градови како што се Кејптаун, Јужна Африка, Мексико Сити и Џакарта, Индонезија, како и делови од Калифорнија, исто така се соочуваат со слични сценарија бидејќи тонат и остануваат без вода.
Ова не е првпат главниот град на Иран да се премести. Во минатото се преместувал многу пати, од Тебриз во Исфахан и Шираз. Некои од овие поранешни главни градови сè уште напредуваат, додека други постојат само како урнатини. Но, ова е првпат иранската влада да го премести главниот град поради еколошка катастрофа.
Сепак, според Рубин, би било грешка да се гледа на ова само низ призмата на климатските промени.
- Лошото управување со водата, земјиштето и отпадните води и корупцијата ја влошија кризата. Ако главниот град се пресели на оддалечениот брег Макран на југ, тоа би можело да чини повеќе од 100 милијарди долари - вели тој.
Регионот е познат по својата сурова клима и тежок терен, а некои експерти се сомневаат во неговата одржливост како национален центар. Преместувањето на главниот град честопати е повеќе поттикнато од политиката отколку од еколошките проблеми, вели Линда Ши, социолог и урбанистички планер на Универзитетот „Корнел“.
- Климатските промени не се тие што ги предизвикуваат овие промени, но се погоден фактор што може да се потенцира за да се избегне преземање одговорност за лошите политички одлуки - заклучува таа.
Извор: scientificamerican.com
Фото: Freepik