Во текот на годишната Ф8 конференција за девелопери во Сан Хозе, Калифорнија, основачот на компанијата „Фејсбук“, Марк Закерберг, откри низа детали за промените - како на мобилната така и на десктоп-верзијата  - истакнувајќи дека ова е најголем чекор за мрежата уште од 2011 година, кога беше претставен времепловот.

Пред сè, тука е новиот дизајн.

- Дури веќе нема да бидеме сини - се пошегува Закерберг на презентацијата коментирајќи го новиот изглед на „Фејсбук“, на кој ќе доминира белата боја.

Логото на социјалната мрежа исто така ќе биде променето и ќе биде помодерно. Клучен аспект на редизајнот ќе биде и поголемиот фокус на групите, кои се еден од најактивните делови на социјалната мрежа. Повеќе од 400 милиони луѓе се зачленети во разни групи, а станува збор за корисници кои не сакаат јавно да споделуваат содржини поради срамежливост или некоја друга причина.

- Таквите заедници ќе добијат централно место на „Фејсбук“, веднаш покрај вашите пријатели - најави Закерберг.

Од неговиот говор можеше да се насети дека „Фејсбук“ се враќа кон поинтимната и поприватна комуникација.

Дополнително, новиот дизајн ќе им овозможи на корисниците да имаат увид во најважните објави во групите во кои членуваат, а кои ќе бидат презентирани во посебен дел.

Од останатите промени, тука е и шифрираното допишување на „Месинџер“, чија содржина веќе нема да биде оставена како траен запис на „Фејсбук“, како и опцијата „Secret Crush“, слична на досегашниот „Facebook Dating“, кој беше достапен само во некои земји. „Secret Crush“ ќе функционира како апликацијата „Тиндер“ - ќе можете да означите некое лице од вашите пријатели кое ви се допаѓа и тоа ќе биде тајно, освен ако тоа лице не означи дека и вие му се допаѓате.

Промени се воведуваат и на „Инстаграм“, а најважна е онаа за приватниот бројач на лајкови. Посетителите на профилот нема да можат да видат колку лајкови има некој, нешто што ќе биде видливо само за сопственикот на профилот.