Употребата на лекови за синдром на дефицит на внимание и хиперактивност (АДХД) значително се зголемила низ цела Европа во текот на изминатата деценија, со најголем пораст кај возрасните, особено жените - според голема студија објавена во „Лансет регионално здравје – Европа“.
Истражувачите анализирале електронски здравствени картони од пет европски земји: Белгија, Германија, Холандија, Шпанија и Велика Британија, опфаќајќи повеќе од 198.000 луѓе помеѓу 2010 и 2023 година. Употребата на лекови за АДХД се зголемила во сите земји во текот на студијата, при што вкупната преваленција се зголемила за повеќе од трипати во Велика Британија и повеќе од двојно во Холандија.
- Забележавме конзистентно зголемување на употребата на лекови за АДХД низ цела Европа, но највпечатливите промени беа кај возрасните, особено жените. Овие наоди веројатно ги одразуваат растечката свест и дијагностицирањето на АДХД кај возрасните, но тие исто така покренуваат важни прашања за долгорочните модели на лекување и потребите за нега - вели Ксинтонг Ли, главен автор на студијата од Универзитетот „Оксфорд“.
Најизразени зголемувања се забележани кај луѓе на возраст од 25 години и повеќе. Во Велика Британија употребата на лекови за АДХД во оваа возрасна група се зголемила повеќе од 20 пати кај жените и 15 пати кај мажите. Иако мажите останале посклони кон примање лекови за АДХД во целина, разликата меѓу половите постојано се намалувала со текот на времето.
- Разбирањето како лековите за АДХД се користат во реалната клиничка практика е од суштинско значење за планирањето на здравствената заштита. Овие податоци можат да им помогнат на здравствените системи да ја предвидат побарувачката и да го намалат ризикот од иден недостиг на лекови, а истовремено да ги истакнат популациите на кои можеби им е потребен поблизок мониторинг - истакнува професорот Даниел Прието-Алхамбра, виш автор на студијата.
„Метилфенидатот“ останува најчесто користениот лек за АДХД во сите земји, додека поновите третмани како што се „лисдексамфетамин“ и „гуанфацин“ покажале постојана употреба по одобрувањето на пазарот. Сепак, продолжувањето на третманот било релативно ниско, значително варирајќи помеѓу земјите.
Наодите го одразуваат растечкото признавање на АДХД како доживотна состојба и ја истакнуваат потребата здравствените системи да планираат за зголемената побарувачка - особено во услови на постојан недостиг на лекови за АДХД во делови од Европа.
Извор: medicalxpress.com
Фото: Freepik