Поминаа три недели откако Северна Кореја го објави својот прв ковид-случај. Владата тврди дека епидемијата е под контрола, но деталите остануваат мистерија.

Ким Хванг-Сун седел сам во својата кујна во Сеул кога му заѕвонил телефонот. Му се јавил кинески брокер со вестите што долго ги чекал. Неговото семејство можело да зборува.

Поминале 10 години откако тој сам избегал од Северна Кореја. Неговите две деца, внуците и неговата 85-годишна мајка сè уште се таму, а тој се откажа од секаква надеж дека некогаш ќе ги извлече. Овие тајни телефонски повици се единствената комуникација со нив. Разговорите се кратки, околу 5 минути.

Два дена претходно Северна Кореја го објави својот прв случај на коронавирус. Податоците објавени од Владата покажуваат дека вирусот брзо се проширил во земјата.

- Ми рекоа дека многу луѓе се болни со температура. Имам чувство дека е прилично лошо. Сите барале лек, нешто што ќе им ја намали температурата, но никој не можел да најде ништо - вели Хванг-Сун за Би-би-си.

Не се осмелил да праша колку луѓе умираат. Ако слушнат како зборуваат за смртни случаи, тоа би можело да се сфати како критикување на Владата, па може да ги убијат членовите на неговото семејство.

Според официјалните податоци, досега околу 15 отсто од жителите се болни со температура. Така се опишуваат случаите бидејќи недостигаат тестови. Севернокорејскиот лидер Ким Џонг-ун го призна недостигот на лекови и ѝ нареди на армијата да ги дистрибуира своите резерви.

Болниците и аптеките во Северна Кореја со години немаат лекови, вели Хванг-сун. Лекарите пишуваат рецепти, а на пациентот останува да го најде тоа што му треба и да го купи.


- Владата велела да варат лисја од бор и да пијат од смесата - вели Хванг-сун. Меѓу препораките од Владата е и гаргара со солена вода за да се ублажат симптомите.

Речиси сите лекови се увезуваат од Кина, а затворањето на границите во последните две години го задуши ова доставување.

Владата нареди национално заклучување на денот кога беше објавен првиот случај. Тоа предизвика загриженост дека луѓето ќе гладуваат. Само некои можеле да ги напуштат своите домови за да работат по нивите.

Сепак, во местата со високи стапки на инфекција, вклучително и главниот град Пјонгјанг, се наведува дека луѓето биле затворени во своите домови.

Ли Санг-јонг, кој ја води веб-страницата Daily NK со седиште во Сеул, има мрежа на извори во Северна Кореја. Во градот Хјесан, до кинеската граница, во текот на мај на луѓето не им било дозволено да ги напуштат своите домови цели 10 дена. Кога било укинато заклучувањето, биле пронајдени десетина луѓе колабирани во домовите поради недостиг на храна.

Досега официјално се пријавени само 70 смртни случаи. Ова ја стави стапката на смртност од ковид во Северна Кореја на 0,002 отсто - најниска во светот.


Тој посочува уште една необичност. Смртните случаи го достигнаа врвот додека случаите сè уште растеа.

- Знаеме дека смртните случаи од ковид-19 имаат тенденција да ги следат инфекциите по две до три недели. Значи, знаеме дека овие бројки се неточни, но не знаеме зошто - вели тој.

Тој објаснува дека покрај погрешното известување на национално ниво, локалните здравствени власти можеби не сакаат да признаат колку луѓе умреле поради страв да не бидат казнети.

Меѓународна помош

Во текот на изминатата недела бројот на пријавени нови случаи се намали, при што во редакцијата во државниот весник во земјата се тврди дека властите „го потиснале и контролирале ширењето на вирусот“.

УНИЦЕФ вели дека нивниот локален персонал сега се вратил во нивната канцеларија во Пјонгјанг откако било укинато заклучувањето.

Но, здравствениот службеник за итни случаи од СЗО, д-р Мајк Рајан, стравува дека ситуацијата се влошува, а не се подобрува. Тој вели дека Северна Кореја не дава пристап до нејзините податоци, па е тешко да се обезбеди соодветна анализа.

Наместо тоа, се чини дека Северна Кореја тивко се потпира на нејзиниот сосед Кина да ја извлече.

Податоците на кинеската царина покажуваат дека севернокорејскиот увоз од Кина се удвоил од март до април.

Иако увозот оваа година постојано се зголемува, во последните неколку месеци нагло се зголемија увезените медицински материјали.

Во април Северна Кореја увезла 1.000 „вентилатори“ од Кина - прва серија од почетокот на пандемијата, според податоците на кинеската царина.

Терминот „вентилатор“ во кинеските податоци може да се однесува и на други, помали типови машини за третман со кислород.

Од јануари до април Северна Кореја купила и над 9 милиони маски за лице. Зголемен е и увозот на лекови и вакцини.

Ким Хванг-сун не слушнал ништо од своето семејство од првиот телефонски повик. По избувнувањето на пандемијата, тој вели дека е потешко да се дојде до нив. Тој е прилично загрижен за неговото семејство. Она што може да го направи е да се помоли затоа што, како и остатокот од светот, и тој е во темнина и не може да помогне.

Извор: BBC
Фото: Korean Central Television