Делфинот Оливер, поради своето пријателско однесување и дружењето со туристите, стана вистинска интернет-сензација и атракција на Јадранското Море, а неодамна од непосредна близина успеа да го сними Игор Гоиќ, искусен подводен снимател и наградуван режисер.
Делфинот Оливер најчесто може да се види во Новиградското и Каринското Море, како и во близина на Масленица, Обровац и Рибница. Сепак, експертите ги предупредуваат туристите кои се капат, особено оние со деца, да бидат внимателни бидејќи Оливер е диво животно.
Популарниот делфин неодамна од непосредна близина успеа да го сними Игор Гоиќ, искусен подводен снимател и наградуван режисер.
- Успеав да го снимам во Новиградското Море. Претходно десет дена активно го следев, дури изнајмив и брод, но до оваа средба немав среќа. Тој слободно се движи, па во прашање е среќа да се биде на вистинското време во вистинско време - изјави Гоиќ.
Импресиите и снимките ги објави на својот фејсбук-профил.
- Гледам дека има доста контроверзии и различни мислења за Оливер. Конечно имав подводна средба со него и, иако и порано сум нуркал со диви делфини, никогаш не сум доживеал некој вака да ми се приближи. Од сите страни ќе слушнеме дека не треба да му се приближуваме, но сметам дека тоа е невозможно бидејќи тој е тој што им се приближува на луѓето, а не обратно. Мојот мотив беше да го снимам под морето бидејќи речиси сите фотографии се од површината, на кои не се гледа неговата вистинска состојба, а снимките им ги проследив на експертите - наведува Гоиќ.
Потоа го опиша Оливер:
- Оливер изгледа добро, активен е и разигран, но низ многу разговори со луѓето во последните десетина дена дознав неколку детали:
Оливер има осум години, а првпат е снимен пред четири години кај Стариград заедно со мајка му. Еден господин кој исто така го следи веќе неколку години го гледал со голем делфин (претпоставувам мајката) кој исчезнал пред две години. Потоа Оливер се заплеткал во јаже од 4-5 метри, на чиј крај имало пловка. Локалните рибари успеале да го скратат тоа јаже на околу еден метар и барем да му го олеснат движењето со отстранување на пловката што го забавувала. Потоа го влечел тоа јаже следната година, кога и ние се организиравме и се обидовме да го фатиме за да му го извадиме, но безуспешно. Овој подвиг беше направен со помош на експерт кој надгледуваше сѐ, бидејќи ловот на делфин е многу чувствителна работа и може кобно да заврши за него, па затоа мора да се пристапи со максимално внимание - опиша Гоиќ.
Оваа година, вели тој, Оливер се појавил без јажето, но со оштетена опашка која е намалена за околу 50 отсто.
- На неговата уста се гледаат многу лузни, а бидејќи опашката му е оштетена, веројатно го променил начинот на исхрана и се храни повеќе со пребарување на морското дно, карпите и слични места каде што пленот потешко може да му побегне. Во продолжението на следењето и документацијата тоа ми е една од целите, да го откријам тоа - вели тој.
Гоиќ вели дека и покрај сѐ, Оливер е во многу добра состојба - не е гладен, активен е и разигран.
- Но она што секако треба да се земе предвид е дека е сам. Тој бара друштво и контакт, но расте осамен и дури и меѓу дивите животни важи за „чуден“, така што никогаш не се знае што може да се очекува од него, иако тоа е случај и кај оние што не се осамени. И покрај сѐ што јавноста мисли за нив, тие знаат да бидат многу непријатни и опасни, а за нивната сила и големина не треба ни да се зборува. Мојот заклучок е: контактот е неизбежен, но обидете се да не го допирате (иако и тоа понекогаш е неизбежно), и кога ќе одлучи да си замине, немојте да го следите, оставете го да прави што сака. Што помалку провоцирање. Инаку, средбата беше прекрасна и секако момент што долго ќе го паметам - заклучи Гоиќ.
Фото:
Facebook