Добрата комуникација со шефот е важна, но важно е да знаете и каде се границите, колку и да мислите дека сте блиски со него. Не мора да споделувате баш сè бидејќи понекогаш дистанцата е најдобрата стратегија за зачувување на стабилноста и напредокот во кариерата.

Деловните односи често балансираат помеѓу професионалноста и личната блискост, зарем не? На крајот на краиштата, поминуваме многу време на работа, па некогаш сме повеќе во друштво на колегите отколку со семејството. Во тоа често спаѓа и надредениот, особено ако работите во ист простор, но секогаш имајте на ум дека тој не ви е пријател и дека сте таму поради работа.

Ако споделувате премногу информации со шефот, тоа може повеќе да ви одмогне отколку да ви помогне, особено кога станува збор за плановите и финансиите.

Планови дека ќе дадете отказ

Можеби размислувате за промена или веќе барате нова работа, но тоа не е нешто што треба да го споделувате со шефот. Штом дознае дека планирате да заминете, голема е веројатноста дека ќе почне да ве исфрла од долгорочните планови или можеби ќе ви замери што сакате да ја напуштите работата.

Вашата финансиска ситуација

Без оглед на тоа дали сте финансиски стабилни или едвај врзувате крај со крај, овие информации можат да бидат погрешно протолкувани. Шефот може да помисли дека се обидувате да добиете покачување преку сожалување или дека не ви е потребна поголема плата ако сте задоволни со својата ситуација. Исто така, тука е и опасноста надредениот да помисли дека ќе прифатите сè што бара од вас ако сте во незавидна положба.

Љубовниот живот

Проблемите или убавите моменти во врската или бракот не се тема за канцеларија. Премногу лични информации можат да го нарушат професионалниот имиџ и да доведат до непријатни ситуации, па секогаш гризнете го јазикот кога ќе посакате да споделите нешто интимно.

Негативни коментари за колегите или фирмата

Критиката може да биде корисна, но само ако е конструктивна и ако постои шанса проблемот да се реши. Сè друго може да звучи како обично озборување.

Здравствени проблеми (освен ако е неопходно)

Доколку не ви е потребна работа од дома, боледување или некои други услови за работа, нема потреба да навлегувате во детали за вашата здравствена состојба.

Озборувања од канцеларијата

Без оглед на тоа колку се интересни, озборувањата за колегите или менаџментот никогаш не се добра идеја! Информациите брзо се шират во деловното опкружување и често стигнуваат до погрешните луѓе.

Вашите претпоставки за одлуките на менаџментот

Шпекулациите за потезите на фирмата можат да изгледаат несериозно или како да ширите паника, па таквите разговори подобро е да ги оставите за приватниот круг на луѓе.

Дополнителна работа или приватен бизнис

Ако работите нешто дополнително или градите сопствен бизнис, важно е да ги проверите правилата на фирмата, но тоа не мора да биде тема на разговор со шефот. Некои работодавци не гледаат благонаклонето на тоа, дури и кога е дозволено.

Судири со колегите

Освен ако токсичната ситуација не излегува од контрола и не бара интервенција од надредениот и од одделот за човечки ресурси, обидете се конфликтите да ги решавате директно и професионално.

Секојдневни фрустрации