Според ново истражување спроведено од медицинскиот центар на Универзитетот „Раш“ во Чикаго, луѓето што консумираат повеќе храна и пијалаци со флавоноли ќе имаат помали проблеми со меморијата во староста.

Флавонолите се вид флавоноид, група природни супстанции кои се наоѓаат во овошјето, зеленчукот, мешунките, чајот и виното. Во истражувањето спроведено на 961 лице со просечна возраст од 81 година, испитаниците пополнувале прашалници за нивната исхрана и направиле тестови за помнење. Потоа тие биле следени во период од 7 години.


Било заклучено дека резултатите на когнитивните тестови на оние лица што консумирале најмногу флавоноли се влошувале побавно со текот на годините во споредба со другите испитаници. Според истражувачите, ова веројатно е поради антиоксидансите и антиинфламаторните карактеристики на флавонолите. 

Истражувачите ги издвоиле и најдобрите намирници, а тоа се кељ, грав, чај, спанаќ, брокула, домати, јаболки, вино, портокали, круши и маслиново масло.

Извор: Interesting engineering
Насловна фотографија: Pixabay