Не е невообичаено во одреден момент од кариерата да стекнете впечаток дека функционирате на повисоко ниво од вашиот шеф. Тоа може да биде фрустрирачки, но не значи автоматски дека сте заглавиле во ќор-сокак или дека нешто не е во ред. Во повеќето случаи тоа укажува на несовпаѓање во брзината на професионалниот развој, очекувањата или организациската структура. Таквата ситуација може да се реши на конструктивен начин доколку ѝ пристапите јасно и промислено.

Разделете ја фрустрацијата од резултатите

Пред да донесете каква било одлука, корисно е да утврдите дали навистина го надминавте вашиот шеф или едноставно сте фрустрирани од бавниот напредок. Понекогаш проблемот не е во разликите во способностите, туку во недостигот на повратни информации, нејасните насоки или ограничените можности за преземање попредизвикувачки задачи.

Направете чекор назад и споредете ги вашите моментални одговорности со оние што сте ги имале пред 6 до 12 месеци. Ако обемот на вашата работа се проширил, но не ви се нудат нови предизвици, тоа е важен показател. Ако вашиот менаџер не ги дефинира јасно очекувањата, и тоа е дел од проблемот за кој вреди отворено да се разговара.

Продолжете да ги развивате вештините без да чекате одобрение

Еден од најефикасните начини за справување со оваа ситуација е да продолжите самостојно да ги развивате вашите вештини. Немојте да чекате менаџерот да ви додели задачи од „следното ниво“. Наместо тоа, препознајте како изгледа работата на повисоко ниво во вашата улога и почнете да ја применувате.

Тоа може да значи преземање одговорност за посложени проблеми, подобрување на начинот на кој ги донесувате и ги образложувате одлуките или усвојување сродни вештини што ве прават поразновиден професионалец.

Однесувајте се кон надредениот со почит

„Управувањето нагоре“ подразбира изградба на силен и стратешки однос со менаџерот со цел заедно да работите поефикасно. На денешното работно место тоа не значи само управување со сопствените задачи, туку и усогласување со приоритетите на шефот. Разбирање на притисоците со кои се соочува и комуникација што ги поддржува заедничките цели. Кога се прави на вистински начин, тоа носи поголема јасност, ги намалува недоразбирањата и ги подобрува севкупните резултати на тимот.

Тоа значи промислено да споделувате информации за вашата работа, да покренувате важни теми и да разговарате за целите за да може менаџерот поефикасно да ве поддржи. Кога успешно управувате со односот со надредениот, не се однесувате пасивно, ниту премногу попустливо. Покажувате свест,  иницијатива и лидерски потенцијал. Тоа придонесува и за вашиот развој и за успехот на тимот.

Работете во различни тимови

Ако вашиот моментален менаџер не може целосно да го поддржи вашиот развој, побарајте можности да го проширите вашето присуство и видливост во организацијата. Тоа може да вклучува меѓусекторски проекти, менторство од поискусни лидери или учество во иницијативи што ги надминуваат рамките на вашиот тим.

Целта не е да го заобиколите вашиот шеф, туку да ја проширите средината во која учите за вашиот развој да не зависи исклучиво од еден однос. Многу професионалци откриваат дека нивниот напредок се забрзува кога ќе почнат да придонесуваат во работата на различни тимови, бидејќи така стекнуваат поголема видливост и поширока перспектива.

Насочете го вниманието на резултатите, а не на егото

Лесно е да почете да  размислувате дека сте „пред“ вашиот шеф, но таквиот поглед може да создаде непотребни тензии. Многу покорисно е да се фокусирате на тоа каде можете да остварите најголемо влијание.

Влијанието на работа ретко зависи од хиерархиската позиција. Многу повеќе зависи од тоа колку ефикасно придонесувате за резултатите што се важни. Кога ќе го префрлите фокусот од споредување на придонес, ќе ви биде полесно да останете приземјени и професионални, додека истовремено продолжувате да го поттикнувате сопствениот развој.

Проценете дали средината сè уште ви овозможува напредок

Во одреден момент можеби ќе треба да проценете дали моменталната позиција сè уште ви ги обезбедува условите потребни за развој. Ако сте го надминале обемот на работа што ви е достапен и не постојат јасни патишта за напредување, тоа може да биде сигнал да истражите други тимови или нови можности.

Кариерата најдобро напредува кога предизвиците и способностите се развиваат напоредно, а не кога едното трајно го надминува другото.

Исто така, корисно е да се запрашате дали сè уште учите нови работи. Дали вашите одговорности се шират и дали постои реален простор за преземање посложени задачи. Доколку таквите показатели изостануваат, истражувањето нови улоги или работни средини можеби не е толку прашање на заминување колку на продолжување на професионалниот развој во средина која може да го следи вашиот раст.

Да го надминете вашиот шеф може да биде непријатно искуство, но истовремено е и знак дека брзо се развивате и размислувате на повисоко ниво. Доколку на таа ситуација ѝ се пристапи на вистински начин, станува можност да го подобрите управувањето со односите, да го проширите вашето влијание и да преземете поголема одговорност за сопствениот развој.