Министерката за образование и наука Мила Царовска денес се сретна со претставници на Сојузот на средношколци на Република Македонија и разговараше за претстојното полагање на матурата, програмите и начинот на кој ќе се организираат испитите, соопшти Министерството за образование и наука.
Царовска истакнала дека државната матура е заокружување на стекнатото знаење, а и информирала дека е донесена одлука за кратење на програмите по кои ќе се одржуваат испитите од државната матура.
- Разбираме дека постои страв и несигурност кај средношколците во однос на безбедноста и самиот процес на подготовка, но токму затоа сме тука, низ заеднички дијалог да понудиме решенија кои ќе гарантираат и безбедност и поддршка. Бидејќи работиме во вонредни услови, подготовките веќе течат. Првата одлука која ја донесовме е да ги скратиме програмите по кои ќе се одржуваат испитите од државната матура со цел полагањето да биде ефективно и организирано - истакнала Царовска.
Таа додала дека ставот на МОН е дека државна матура треба да има како и во сите останати европски држави и држави од регионот и Македонија не смее да биде исклучок по негативни практики.
- Образованието мора да продолжи да тече дури и во овие услови, бидејќи се работи за иднината на младите генерации. Ние нема да дозволиме пандемијата да се одрази врз нивниот развој и нивниот напредок. Иако оваа година сите се соочуваме со нови предизвици, мора да обезбедиме континуитет во образовниот процес. За ова се бориме од самиот почеток и нема да отстапиме од оваа цел. Министерството за образование и наука за многу кратко време воспостави модел на настава која функционира и овозможува пристап до образование за секое дете во државата. Имаме шест месеци да се подготвиме за државната матура, што е повеќе од доволно за организирање на овој процес - рекла Царовска.
Средношколците на средбата биле информирани дека МОН преку Државниот испитен центар веќе ги известил секретарите на училиштата и наставниците за новините во државната матура: датумите на полагање, листата за избор на предмети, проширената листа на екстерни предмети за гимназиско образование со информатика и географија, новата програма за проектна задача, внесот на податоци во база, како и сите рокови при реализација на државната матура.
- Наставниците се тие кои најдобро ќе ги водат учениците низ процесот на полагање на државната матура. Истовремено, МОН е во постојан контакт со матурантите за да бидат во тек со сите новини со матурата и заеднички да организираме успешно полагање. Заедно со учениците, училиштата, со наставниците и секако со здравствените власти ќе најдеме начин самото полагање да биде безбедно. Истовремено, работиме на креирање систем кој ќе им помогне на средношколците да се подготват и да постигнат високи резултати на државната матура, кои ќе им бидат основа за понатамошно нивно надградување - се наведува во соопштението од МОН, во кое се додава дека на состанокот била најавена и целосно нова концепција за државна матура која ќе се применува од 2021/2022 година, а во чија изработка ќе бидат вклучени и наставниците и средношколците.
Фотографии: МОН