Популарниот стриминг-сервис „Нетфликс“ воведе нова глобална функција создадена да ја поврзе љубовта кон книгите со гледањето филмови и телевизиски серии. На својата почетна страница претстави посебен дел наречен „Гледајте ги вашите омилени книги“, со цел на едно место да ги обедини љубителите на книжевноста.

Новата дигитална содржина ги претвора телевизиските екрани на корисниците во своевидна виртуелна книжарница, нудејќи богата колекција на екранизации на книжевни дела. „Нетфликс“ се надева дека овој простор ќе ги поттикне страсните читатели да ја откријат својата следна омилена приказна на екранот.

Лансирањето доаѓа во период кога книжевните адаптации доминираат во онлајн културата и гледаноста. Вирални заедници како „Букток“ на „Тик-ток“ создаваат огромен интерес за книги кои подоцна стануваат големи телевизиски хитови.

Според тимот што стои зад проектот, новата функција е директно инспирирана од ентузијазмот и посветеноста на оваа глобална читателска заедница. Наместо сите адаптации да бидат сместени на една листа, создаден е систем што е многу поприспособен на индивидуалните вкусови на корисниците.

Од „Паркот јура“ до „Хобитот“

Развојниот тим одлучил целиот простор да го организира околу девет различни „читателски личности“, со цел да го долови чувството на посета на книжарница. Ваквиот пристап им олеснува на корисниците да пронајдат нови наслови според своите книжевни интереси.

Претплатниците што сакаат напнати трилери можат да ја погледнат екранизацијата на познатиот роман на Мајкл Крајтон, „Паркот јура“. Овој филмски класик е претставен заедно со готски дела како филмската верзија на безвремената приказна на Мери Шели, „Франкенштајн“.

За љубителите на епските авантури, тука е и адаптацијата на легендарното дело на Џ. Р. Р. Толкин, „Хобитот“, која ги носи гледачите во Средната Земја и нуди часови фантастична забава.

Претставени се и современи книжевни хитови

Значајно место имаат и современите книжевни феномени, со цел да се привлечат читателите кои ги следат актуелните листи на бестселери. Меѓу нив е романтичната драма „Ова завршува со нас“ од Колин Хувер, која предизвика големо внимание и многубројни реакции кај читателите и гледачите.

Љубителите на британските криминалистички приказни можат да уживаат и во долгоочекуваната адаптација на бестселерот на Ричард Осман, „Клубот на убијци во четврток“, која ги оживува омилените детективи од пензионерска заедница пред светската публика.

- Забележавме вистинска страст кај обожавателите кон библиотеката на книжевни адаптации на „Нетфликс“. Нашиот тим сакаше да ја прослави таа посветеност со создавање посебно место каде што корисниците ќе можат да ги истражуваат своите омилени наслови и да откриваат нови приказни што ќе ги засакаат - вели Менси Пател, виш директор за промоција на содржини во „Нетфликс“.

Пател објасни дека главната цел била да се создаде интересен простор што ќе го направи откривањето нови серии и филмови забавно и возбудливо искуство.

Компанијата се надева дека новата функција ќе им понуди на претплатниците речиси бесконечна листа за гледање, слична на чувството кога покрај креветот стои куп непрочитани книги кои чекаат да бидат отворени.

Новата функција веќе е достапна за корисниците низ светот и не бара ажурирање на апликацијата. Таа е истакната на почетната страница на платформата и може лесно да се пронајде преку пребарување со клучни зборови.

Извор: BIZlife.rs
Фото: Unsplash