За многу пациенти со шизофренија, други психијатриски заболувања или состојби како хипертензија и астма, земањето лекови секој ден може да биде тешко. За да го надминат овој предизвик, истражувачите од МИТ развиле апче кое може да се зема само еднаш неделно и постепено го ослободува лекот од желудникот.

Во клиничко испитување од фаза 3 спроведено од компанијата „Линдра терапеутикс“, истражувачите користеле апче кое се зема еднаш неделно за да достават широко користен лек за справување со симптомите на шизофренија. Тие откриле дека овој режим на третман одржува конзистентни нивоа на лекот во телата на пациентите и ги контролира нивните симптоми, како и дневните дози на лекот.

- Нешто што мора да се зема еднаш дневно го претворивме во еднаш неделно, користејќи технологија што може да се приспсоби за различни лекови. Способноста да се обезбедат одржливи нивоа на лекови во текот на долг временски период, во систем што е лесен за администрирање, го олеснува осигурувањето дека пациентите ги примаат своите лекови - вели Џовани Траверсо, вонреден професор по машинско инженерство на МИТ, гастроентеролог и автор на студијата.

Системот за испорака на лекот има шест склопливи краци, што му овозможува да се смести во капсула. Капсулата се раствора кога уредот ќе стигне до желудникот, дозволувајќи им на краците да се отворат. Откако ќе се случи тоа, уредот станува преголем за да помине низ пилорусот (излезот од желудникот), па затоа слободно лебди во желудникот додека лековите полека се ослободуваат од краците. По околу една недела, краците се откинуваат сами, и секој сегмент излегува од желудникот и поминува низ дигестивниот тракт.

Тимот на МИТ одлучил да се фокусира на шизофренијата, со надеж дека режимот на лекови што може да се администрира поретко, орално, би можел да го олесни третманот за пациентите и нивните старатели.

Студијата вклучила 83 пациенти на пет различни локации низ САД. 45 од пациентите ја завршиле целата петнеделна студија, за време на која земале по една капсула неделно. За време на студијата, истражувачите ја мереле количината на лекот во крвотокот на секој пациент. Секоја недела тие забележале нагло зголемување кога била земена таблетата, проследено со бавно опаѓање во текот на следната недела. Нивоата биле во оптималниот опсег и имало помали варијации со текот на времето отколку што се забележува кога пациентите земаат таблета секој ден.

Користејќи Скала за позитивен и негативен синдром (ПАНСС), истражувачите исто така откриле дека симптомите на пациентите останале стабилни во текот на целата студија.

Некои пациенти доживеале благи несакани ефекти, но тие не траеле долго. Истражувачите сега се надеваат дека ќе завршат поголеми студии од фаза 3 пред да аплицираат за одобрение од ФДА за овој начин на администрирање на лекот. Тие, исто така, се подготвуваат за испитувања од фаза 1 со употреба на капсулата за администрирање на други лекови, вклучително и контрацептивни средства.