Од „Гугл мапс“ се надеваат дека претстојната одлука на владата на Јужна Кореја конечно ќе ја отвори вратата кон единствената напредна демократија во светот каде што таа услуга сè уште не е целосно функционална.
Зошто е тоа важно?
Јужна Кореја, долгогодишен сојузник на САД и една од најповрзаните земји во Азија, се издвојува како едно од ретките места во светот каде што „Гугл мапс“ не работи како на други места.
За „Гугл“, пристапот значи повеќе од погодност за патниците. 51 милион технолошки вешти корисници од Јужна Кореја претставуваат огромен пазар за глобалниот систем за навигација и рекламната мрежа на компанијата. Навлегувањето на тој пазар потенцијално би можело да ги привлече јужнокорејските потрошувачи и бизниси во поширокиот дигитален екосистем на „Гугл“.
Што треба да знаете?
Притисокот на „Гугл“ да ја надгради својата услуга за мапи во Јужна Кореја датира од првата деценија на веков, кога почна да бара пристап до деталната мапа на земјата во размер 1:5.000 - многу попрецизна од јавно достапната мапа од 1:25.000. „Гугл“ тврди дека ова ниво на детали е стандардно и е од суштинско значење за модерната навигација. Сепак, Јужна Кореја ги класифицира податоците од мапата со висока резолуција како национално безбедносно средство и забранува нивно извезување на странски сервери без одобрение од владата.
Иако „Гугл“ пристапува до некои детални податоци за мапирање преку трета страна - „T Мап“, сепак се работи само за основни функции. Клучните функции, како што е навигацијата, не се достапни, принудувајќи ги корисниците да се префрлат на локални апликации како „Нејвер мап“ и „Како мап“ за сигурни насоки и информации за транзит.
Сржта на спорот се сведува на националната безбедност. Јужнокорејските претставници тврдат дека извозот на прецизни податоци за мапирање би можел да ги изложи воените објекти и други чувствителни локации.
„Гугл“ понуди голем број отстапки, вклучително и претходно согласување за замаглување слики од такви страници и понуда за отстранување на координатите за географска ширина и должина од својата услуга за јужнокорејските локации, доколку му се дозволи пристап.
Една од клучните преостанати точки на „сопнување“ е одбивањето на „Гугл“ да постави локален центар за податоци, што би го подложило на јужнокорејските прописи за пријавување приходи и транспарентност на даноците.
Што велат луѓето?
-„Гугл“ тесно се консултира со јужнокорејската влада за тоа како да ги имплементира барањата како што се безбедносните мерки што ги бара владата. Покрај тоа, доколку е потребно, размислуваме за купување и користење слики одобрени од владата кои веќе се маскирани од домашните партнери - истакнал Крис Тарнер, потпретседател на „Гугл“ за политика на знаење и информации.
Што ќе се случува следно?
Конечната одлука за барањето на „Гугл“ се очекуваше во октомври, но Министерството за земјиште на Јужна Кореја ја одложи одлуката за дополнителни разговори. Прашањето треба да се реши овој месец.
Извор: newsweek.com
Фото: Freepik